Siońnia pa-za miežami Biełarusi pražyvaje bolš za 3,5 miljony biełarusaŭ. Toje, što heta bahaty patencyjał dla raźvićcia našaj krainy — ciapier užo ahulnapryznany fakt, i adno ź jaskravych śviedčańniaŭ hetamu — dziaržaŭnaja zakłapočanaść aznačanaj śfieraj. U 2014 hodzie byŭ pryniaty inicyjavany Zhurtavańniem biełarusaŭ śvietu «Baćkaŭščyna» Zakon Respubliki Biełaruś № 162-3 «Ab biełarusach zamiežža». Taksama dziejničaje padprahrama «Biełarusy ŭ śviecie» ŭ ramkach dziaržaŭnaj prahramy «Kultura Biełarusi» na 2016—2020 hady.
Daśledčyki biełaruskaha zamiežža adznačajuć šyrokuju hieahrafiju biełaruskaj prysutnaści ŭ śviecie i nasyčanaść biełaruskaha žyćcia za miažoj. Jany ciešacca z taho, što materyjałaŭ dla daśledčyckaj pracy chopić jašče nie na adno pakaleńnie ich nastupnikaŭ. Razam z tym «Baćkaŭščyna» pierakanałasia ŭ nizkaj abaznanaści hramadstva i supracoŭnikaŭ dziaržaŭnych ustanoŭ jak pra istotny ŭniosak dyjaspary ŭ raźvićcio biełaruskaj prysutnaści ŭ roznych krainach śvietu, hetak i pra dapamohu ź jaje boku samoj Biełarusi.
Dać chutki adkaz na pytańnie «Što dyjaspara robić dla Biełarusi?» ciažka jašče i tamu, što paviedamleńni pra heta albo nie traplajuć u ŚMI, albo hublajucca ŭ płyni navinaŭ i paprostu zabyvajucca.
Prajekt ZBS «Baćkaŭščyna» «Dyjaspara dla Biełarusi» maje na mecie zapačatkavać i raźvivać admysłovy centralizavany resurs, ahrehatar infarmacyi pra najbolš značnyja pośpiechi biełarusaŭ-zamiežnikaŭ jakraz u spravie dapamohi samoj Biełarusi, jak krainie, tak i asobnym inicyjatyvam, ustanovam i prosta ludziam.
Infarmacyja, jakuju my sabrali i prapanujem da Vašaj uvahi zaraz — tolki pačatak dla svojeasablivaj «encykłapiedyi», bo my adnavili daloka nie ŭsio, što zrabili dla krainy našyja surodzičy z zamiežža. My viedajem heta dakładna! Tamu źviartajemsia da vas z prośbaj raspavieści, što vam viadoma pra dapamohu Biełarusi z boku dyjaspary.
«Što dyjaspara robić dla Biełarusi?» Davajcie razam raspaviadziem pra heta samim sabie i ŭsiamu śvietu!
