Arciom Skarabahaty byŭ niezaležnym naziralnikam na ŭčastkach №3 u Baraŭlanach i №2 pasiołku Lasny, jany mieściacca ŭ adnym budynku ŭ miascovym Domie kultury ahraharadka Lasny, što pad Minskam.
«Arcioma pasadzili ŭ mašynu i jon paśpieŭ mnie patelefanavać. Skazaŭ, što nieviadomyja ŭ cyvilnym vyvieli jaho z budynka. Nie pradstaŭlalisia, dakumienty nie pakazvali, zapchnuli ŭ aŭtamabil. Bolš raspavieści nie paśpieŭ. Ciapier u Arcioma vyklučany telefon», — paviedamiŭ «Našaj Nivie» brat Arcioma Skarabahataha.
Kryścina Šabłoŭskaja, namieśnica staršyni kamisii na Baraŭlanskim učastku, skazała, što jana sama vyklikała milicyju — Skarabahaty nibyta pieraškadžaŭ kamisii pracavać.
«Parušaŭ pravaparadak, hučna razmaŭlaŭ, ustupaŭ u niecenzurnuju łajanku z naviednikami. My vymušanyja byli vyklikać orhany ŭnutranych spraŭ», — skazała Šabłoŭskaja.
Jana zapeŭniła: pryjechali ludzi ŭ formie, składali na naziralnika pratakoł. Dalej za losam Skarabahataha jana nie sačyła, ci vyvodzili jaho kudyści ludzi ŭ cyvilnym nie bačyła, bo «siońnia ž vybary, na ŭčastku šmat narodu».
Paźniej, stała viadoma, što Arcioma advieźli ŭ adździaleńnie milicyi ŭ ahraharadok Sienicu. Pa słovach svajakoŭ Skarabahataha, tam chłopca «pravieryli na psichatropnyja rečyvy, ničoha nie znajšli i skazali, što ŭ paniadziełak 19 lutaha buduć sudzić za łajanku matam».
Noč Arciom Skarabahaty praviadzie pad vartaj.
Skarabahatyja — heta viadomaja šmatdzietnaja siamja. Jany biełaruskamoŭnyja, a pa vieravyznańni — pratestanty.
