Mikałaj Statkievič paviedamiŭ, što jaho ździviła novaja zajaŭka paplečnikaŭ pa śviatkańni stahodździa BNR.
«Čatyry arhanizacyi z 13 pajšli na nieŭzhodnienyja z arhkamitetam dziejańni. Raniej my abmiarkoŭvali našy płany, pryniali ahulnaje rašeńnie. Tamu my ździŭlenyja takimi pavodzinami. Miarkuju, što heta nie narmalna.
Da taho my ź ciažkaściu znajšli adzinstva — i heta jakraz narmalna. Niekatoryja ŭzbudzilisia nakont strymu — dobra, što strymaŭ nie było 100 hadoŭ tamu, bo mnohija inakš by stavilisia da baćkoŭ zasnavalnikaŭ BNR, — raspavioŭ Mikałaj Statkievič. —
Padazreńni zakradvajucca, što admova našaj zajaŭcy była paśla niejkich sustreč — chtości namiaknuŭ, maŭlaŭ, adkińcie hetuju, my novuju padamo.
My bačym jak ułada baicca šeściaŭ, luboj nahody, kab ludzi sabralisia razam. U stalicy bolš-mienš spakojna, u rehijonach sacyjalnaja napružanaść raście. Tamu ŭłada nie choča, kab ludzi źbiralisia na vulicach, kancert ličyć bolš biaśpiečnaj formaj.
Ja razumieju maładych ludziej, jakija vyraśli pry hetaj uładzie, jakija pryvykli, što Łukašenka isnuje ad ich naradžeńnia. Jany prystasoŭvajucca da sistemy. Kali siarod ich znachodziacca tyja, chto choča štości rabić — małajcy.
Ale isnuje palityčnaja apazicyja, jakaja musić pastajanna bić u zvany, nahadvać, što ŭ krainie nienarmalnaja situacyja, bolš nidzie ŭ Jeŭropie takoha niama. Heta abaviazak apazicyi. I heta važna niepasredna zaraz».
Čamu šeście musić być, Statkievič padrabiazna rastłumačyŭ u svaim fejsbuku:
«Kali ŭ hadavinu žorstkaha padaŭleńnia narodnaha vystupu za svaje pravy my budziem tolki słuchać muzyku i tančyć u zaharodcy za ramkami, to my dyskredytujem siabie ŭ vačach tych ludziej, jakija pajšli za nami hod tamu».
Ale kali ŭłada dziejničaje supolna z častkaj apazicyi — heta ŭžo dobra, adznačyŭ Statkievič.
«Ułada namahajecca ŭpichnuć nam kancert u centry horada — heta dasiahnieńnie! Ale heta vynik našaj šmathadovaj pracy, akcyjaŭ, šeściaŭ, mitynhaŭ. Tamu chaj kancert budzie našym padarunkam aficyjnaj apazicyi. A my (kamitet pa śviatkavańni) padumajem, što rabić dalej» — paviedamiŭ jon.
