Žury ahučyła šort-list naminataŭ premii «Debiut» imia Maksima Bahdanoviča. Sioleta ŭ jaho ŭvajšli nastupnyja knihi i aŭtary, paviedamlaje Biełaruski PEN-Centr:
Proza
Alina Dłatoŭskaja. Hien ziamli. — Minsk: Knihazbor
Zarasłava Kaminskaja. Rusałki kličuć. — Minsk: Knihazbor
Ivan Stoma. Pa žyvych śladach daŭno pamierłych prodkaŭ. — Połacak: Vydavieckaja inicyjatyva «Połackaje lada»
Pierakład
Alena Kazłova (pier. ź finskaj): Cima Parvieła. Eła i siabry. — Minsk: Mastackaja litaratura
Andrej Kim (pier. z anhielskaj): Kłajv Stepłz Ljuis. Chroniki Narnii: Leŭ, Viadźmarka i Harderob. — Minsk: Pazityŭ-centr
Hanna Komar, Jula Cimafiejeva, Natalla Binkievič (pier. z anhielskaj): Čarlz Bukoŭski. Śviatło, i pavietra, i miesca, i čas. — Minsk: Charviest
Žury pryniało rašeńnie sioleta nie vyznačać šort-list i pieramožcu ŭ naminacyi «Paezija».
Taksama na cyrymonii ŭznaharodžańnia, jakaja maje adbycca ŭ sakaviku, budzie ŭručana śpiecpremija.
Pieramožcy premii ŭ kožnaj z naminacyjaŭ atrymajuć ček ad Fondu «Viartańnie» na sumu, ekvivalentnuju 2000$ pavodle kursu Nacyjanalnaha banka RB. Taksama žury moža pryniać rašeńnie pra ŭručeńnie zaachvočvalnych pryzoŭ. Zhodna z Pałažeńniem premii, u adnoj ci niekalkich naminacyjach pieramožca moža nie vyznačacca.Sioleta ŭ žury premii ŭvajšli: Ihar Babkoŭ, Michał Baranoŭski, Pavał Bierahovič, Maryna Viesiałucha, Siarhiej Dubaviec, Maryja Martysievič, Usievaład Ścieburaka.
Premija «Debiut» imia Maksima Bahdanoviča była zasnavanaja ŭ 2010 hodzie Biełaruskim PEN-centram, Dabračynnym fondam «Viartańnie» i Sajuzam biełaruskich piśmieńnikaŭ. Siarod papiarednich pieramožcaŭ premii — Vital Ryžkoŭ, Andruś Horvat, Natałka Charytaniuk, Anton Francišak Bryl, Viktar Marcinovič, Andrej Adamovič, Michał Baranoŭski, Adela Dubaviec, Hanna Jankuta, Uładź Lankievič, Kaciaryna Oaro, Kaciaryna Macijeŭskaja, Alaksiej Pałačanski, Taćciana Niadbaj, Anatol Ivaščanka, Śviatłana Rohač i inš.