6 sakavika ŭ Sankt-Pieciarburhu zatrymali čacviarych mužčyn. Ich padazrajuć u machlarstvie. Try hady jany handlavali pašpartami nieisnujučaj krainy, piša miascovaje vydańnie «Bumaha».
Pa viersii śledstva, u 2015 hodzie čacviora zatrymanych adkryli ŭ Pieciarburhu arhanizacyju, jakuju pazicyjanavali jak konsulstva astraŭnoj dziaržavy karybskaha basiejna «Karaleŭstva ASPI» («Svabodny vostraŭ ASPI»). Hetaj dziaržavy na samaj spravie nie isnuje, padkreślivajuć u palicyi.
Sa studzienia 2015 hoda supracoŭniki konsulstva pradavali pašparty i pravy na aŭto z ukazańniem rekvizitaŭ «Karaleŭstva ASPI». Pry hetym u dakumientach stajała rehistracyja, ale nie ŭ ASPI, a ŭ haradach Biełarusi. Kaštavali dakumienty ad 15 da 100 tysiač rasiejskich rubloŭ (prykładna ad 300 da 1800 dalaraŭ). Asnoŭnymi pakupnikami byli pracoŭnyja mihranty, u tym liku nielehalnyja.
6 sakavika supracoŭniki vydumanaha konsulstva zatrymali «ŭ ramkach papieradžalnych mierapryjemstvaŭ pa źnižeńni ŭzroŭniu terarystyčnaj pahrozy pierad vybarami prezidenta i ČS-2018 pa futbole». Padčas pieratrusaŭ ŭ ich znajšli niezapoŭnienyja błanki pašpartoŭ «Karaleŭstva ASPI», adbitki piačatak z rehistracyjaj u Minsku, bolš za sotniu fotazdymkaŭ mahčymych kłijentaŭ, a taksama zbroju — pistalety i patrony.
Na mužčyn zaviali spravu za «machlarstva, ździejśnienaje hrupaj asob pa papiaredniaj zmovie».
Razam z tym, pa dadzienych kartateki sudovych spraŭ, kiraŭnictva konsulstva ŭ Pieciarburhu na praciahu apošnich hadoŭ nieadnarazova abaraniała ŭ sudach intaresy «hramadzian» ASPI. Tak, u 2017 hodzie «konsułam» atrymałasia damahčysia admieny štrafu ad daišnikaŭ u 7 tysiač rubloŭ dla adnaho ź ich za toje, što toj pajechaŭ pa horadzie z pravami «Karaleŭstva ASPI». Sud staŭ na bok pradstaŭnikoŭ nieisnujučaj dziaržavy i pakazaŭ, što inśpiektary nie dakazali, što pravy «Karaleŭstva ASPI» źjaŭlajucca padrobkaj.
