Epocha źmianiłasia, a vučać pa-daŭniejšamu. Kałaž z sajta Bntu.by.
Ja amal zakančvaju Biełaruski nacyjanalny techničny ŭniviersitet, budaŭničy fakultet. I voś u toj čas jak z prezidentam my budujem IT-krainu, vykładčyki budfaka zabaraniajuć vykarystoŭvać kampjutar dla vykanańnia kursavych rabot. Ad słova «zusim».
Matyvujuć, što zmahajucca z płahijatam. Ale heta nonsens. Nikomu nie sakret, što isnuje cełaja industryja pa pierapisvańni kursačoŭ. Chto choča śpisać i kupić — zrobić.
Jašče adna adhavorka vykładčykaŭ: płahijataraŭ i kupcoŭ kursavych nie vyhnać, bo zabaraniajuć, tamu choć jak vychavać voś takimi durnymi patrabavańniami. Łuchta!!! Prosta vykładčyki trymajucca za drobnyja premii (viadoma, što kali adličvać šmat — premija hudbaj), a jašče im lanota prymać pierazdačy, bo druhaja praca jość, i časam jana nie druhaja, a pieršaja, a vykładańnie — pa ryžańkim ad času kanśpiekcie studenckich časoŭ vykładčyka. Dyj da taho ž, čamu praz hultajoŭ pakutujuć narmalnyja studenty?
Jašče adzin nonsens. U budaŭničaj halinie isnujuć standarty. Biełaruś dva hady tamu pierajšła na jeŭrapiejskija z savieckich. A voś kafiedra mietałakanstrukcyj vučyć pa siońniašni dzień savieckim, niekatoryja ź jakich admienieny navat u Rasii.
I navat zabaraniajuć vykarystoŭvać jeŭrapiejskija ŭ vučebnym prajektavańni. Adna z dumak, čamu tak — heta tamu, što 90 adsotkaŭ vykładčykaŭ nie žadajuć raźbiracca ni z čym novym i pracujuć pa starych BNIPach (budaŭničych normach), ale dajuć pracu astatnim 10%, jakija zaprašajuć studentaŭ na płatnyja kursy pa vyvučeńni jeŭrakodaŭ. U navučalny čas kansultavać studentaŭ, jak pracavać ź jeŭranormami, z hetych 10% vykładčykaŭ admaŭlajecca pałova — idzicie na płatnyja kursy. Heta vidavočnaja nizaść i paskudstva. Ale dobry sposab smaktać hrošy z prajektnych firmaŭ.
Hladzicie. Kožny hod z 200 studentaŭ vypusku 60 iduć u prajektavańnie. Za piać hadoŭ asvoili b hetyja normy va ŭsich firmach. Ale nie. Vykładčyki, vidać naŭmysna, nie vučać, kab smaktać hrošy ź firmaŭ. Pryjazdžaje dva čałavieki raz na hod i pravodziać kursy pa novych normach biez adryvu ad vytvorčaści i za vialikija hrošy.
Što nie pieraškadžaje kafiedry zasvojvać hrošy dziaržavy ŭžo dziesiać hadoŭ na vyvučeńnie jeŭrapiejskich normaŭ i raskazvać na kanfierencyjach, jak jany intehravali ich u navučalny praces.
Varta adznačyć što nie vieś budaŭničy fakultet hniły, jość vykładčyki, jakim choć za 80, ale jany aŭtary samaha sučasnaha i šykoŭnaha z ruskamoŭnych padručnikaŭ pa miechanicy — ich lublu i pavažaju. Tady jak u niekatorych inšych vykładčykaŭ patrabavańni nastolki durnyja, što nielha navat vykarystać prahramavany kalkulatar!
Bo vykładčyk nie pabačyć chod vyličeńniaŭ (naprykład A+B=3+2=5, a na kalkulatary, nie kažučy pra sistemy inženiernych vyličeńniaŭ, tak nie zrobiš. Jany vydaduć na dysplej adkaz A+B=5, a vykładčyki ŭsio pierakreślivajuć. Jany jašče kažuć: «U našy časy (60-ja) my i ŭvohule biez kalkulataraŭ žyli i vyraśli narmalnymi ludźmi». Jašče kažuć, što dzieści ŭ Hiermanii taksama takija ž patrabavańni. Ale heta poŭnaja łuchta. Bolšaść z vykładčykaŭ i moŭ zamiežnych nie viedajuć.
Ja voś viedaju studentaŭ z Francyi dy Polščy — nidzie niama takoha. Naadvarot, u navučalnych prahramach tam akcent na avałodvańnie kampjutarnymi technałohijami.
Moža pakazacca, što heta drobiaź. Ale nie zusim. Pa-pieršaje, heta adstavańnie ad śvietu. Pa-druhoje, durnaja muštra rychtuje raboŭ, a nie tvorcaŭ. Pa-treciaje, baj-baj ekspart tych ža inžynirynhavych pasłuh, a mahli b chmarčosy dla siabroŭ Łukašenki z Katara malavać. Pa-čaćviortaje, baj-baj zamiežnyja studenty (budfak ź ich niaźmiennaj z 60-ch hadoŭ prahramaj prosić šalonyja hrošy z zamiežnikaŭ za padrychtoŭku na ruskaj movie). Pa-piataje, kansiervujecca adstavańnie budaŭničaj haliny.
Dla mianie heta ŭsio amal zakončana, pracuju nad dypłomam, ale škada zmarnavanaha času. I kryŭdna za krainu.
