Śviatasłaŭ Baranovič prysudžany da 3 hadoŭ kałonii. Padčas letašniaha «Marša niedarmajedaŭ» jon udaryŭ amapaŭca ŭ cyvilnym, kali toj kinuŭsia na pratestoŭcaŭ.
Jašče da pačatku pasiadžeńnia było viadoma, što Baranovič, najchutčej, nie budzie pryznany palitviaźniem. Paśla ahałošvańnia vyraku pazicyja pravaabaroncaŭ nie źmianiłasia.
«Z ulikam asablivaściaŭ i abstavinaŭ spravy, i pakazańniaŭ samoha abvinavačanaha palitviaźniem my jaho nie pryznajem, - raspavioŭ «Našaj Nivie» pravaabaronca-viasnoviec Valancin Stefanovič. — Heta było hvałtoŭnaje pravaparušeńnie — pavodle našych kryteraŭ, u takim vypadku my nie pryznajem čałavieka palitviaźniem. Taksama ŭličvajem jaho pazicyju i pakazańni ŭ sudzie: Baranovič pryznaŭ vinu ŭ poŭnym abjomie i kazaŭ, što viedaŭ, što biŭ milicyjanta».
Nie pryznajuć Baranoviča palityčnym viaźniem i inšyja biełaruskija pravaabaroncy. Pra heta raspavioŭ Jeŭraradyjo kiraŭnik Biełaruskaha Chielsinskaha kamiteta Aleh Hułak.
