Na rasijskim impierskim sajcie «Matierik» źjaviŭsia artykuł pad krasamoŭnaj nazvaj «Mifatvorčaść biełaruskich nacyjanalistaŭ hatovaja padtrymać ŭładu RB», u jakim aŭtar, jaki niehatyŭna stavicca da BNR, krytykuje biełaruskija ŭłady za dazvoł śviatkavańnia Dnia Voli.
Cikava, što aŭtaram materyjała i krytykam biełaruskaj ułady źjaŭlajecca doktar histaryčnych navuk, prafiesar kafiedry historyi Biełarusi i palitałohii Biełaruskaha dziaržaŭnaha technałahičnaha ŭniviersiteta Uładzimir Kaźlakoŭ.
Uładzimir Kaźlakoŭ.
Svoj artykuł jon pačaŭ z krytyki «śviadomych»:
«Abhruntavanaść i praŭdzivaść histaryčnych faktaŭ nie vielmi chvalujuć biełaruskich «nacyjanalna śviadomych» historykaŭ i publicystaŭ. Samaje hałoŭnaje dla ich — raspaŭsiudzić vydumki, nakiravanyja suprać savieckaj historyi, pierakrucić ci zhańbavać pamiać našych baćkoŭ i dziadoŭ, adpaviadajučy zachodnim štampam i ŭzoram».
Dalej užo krytykujecca biełaruskaja ŭłada, na jakuju nibyta ŭpłyvajuć «śviadomyja»:
«Dla manipulacyi hramadskaj śviadomaści vykarystoŭvajucca roznyja pryjomy i mietady, na jakija paddajucca i biełaruskija čynoŭniki. I voś adzin ź ich na pytańnie: «Ci budzie śviatkavać 100-hodździe BNR na dziaržaŭnym uzroŭni?», «dypłamatyčna» adkazvaje: «Kali hetaje śviata nieabchodny hramadstvu, to my budziem realizoŭvać». Takaja «dypłamatyčnaja» abyjakavaść vielmi ździŭlaje. A jakaja pazicyja samich uładaŭ? Čakać akazałasia, na žal, niadoŭha. Minski harvykankam dazvoliŭ apazicyjnym hrupam (a mienavita jany nastojvali na hetym śviacie) adznačyć 100-ja ŭhodki BNR u centry biełaruskaj stalicy. Kamientary zališnija».
Dalej prafiesar daje svaju acenku tym umovam, u jakich stvarałasia BNR. Jon piša, što BNR, jakaja stvarałasia va ŭmovach niamieckaj akupacyi, nie moža ličycca dziaržavaj, a pavodziny dziejačaŭ BNR u adnosinach da Niamieččyny Kaźlakoŭ ličyć «chałujstvam» (heta słova paŭtarajecca ŭ tekście ažno 5 razoŭ).
Uzhadaŭ čamuści prafiesar u tekście i pra Ukrainu:
«Ideałohija i psichałohija sučasnaha «majdana» sfarmavałasia jašče ŭ časy Ukrainskaj narodnaj respubliki, dziejačy jakoj demanstravali piačornuju rusafobiju i ščyraje «chałujstva» pierad hiermanskimi akupantami».
Na dumku Uładzimira Kaźlakova, mienavita BSSR vykanała dziaržaŭnuju, palityčnuju, ekanamičnuju i kulturnuju rolu abjadnańnia biełaruskaj nacyi.
Cikava, što partał «Matierik», dzie byŭ apublikavany hety artykuł, naležyć rasijskamu Instytutu krain SND, dyrektaram i zasnavalnikam jakoha źjaŭlajecca adyjozny deputat Dziaržaŭnaj Dumy Rasii Kanstancin Zatulin.
Kanstancin Zatulin.
Zatulin, viadomy svaimi impierskimi pohladami, taksama źjaŭlajecca namieśnikam staršyni kamiteta Dziaržaŭnaj Dumy pa spravach SND i suviaziach z suajčyńnikami. U 2014 hodzie Kanstancin Zatulin braŭ aktyŭny ŭdzieł u anieksii Kryma.