Delfi.lt
U Vilni darožnaja palicyja zatrymała daradcu pasolstva Biełarusi ŭ Litvie za toje, što jon pakinuŭ miesca DTZ. U biełaruskim pasolstvie kažuć, što dypłamat byŭ ćviarozy, ale admoviŭsia prachodzić ahlad, bo mieŭ na heta poŭnaje prava.
Avaryja adbyłasia ŭ hetu niadzielu kala 18.20 u spalnym rajonie na vulicy Habijos.
— Heta zdaryłasia ŭ dvary šmatpaviarchovaha doma. Hyundai IX35 biełaruskaj ambasady začapiŭ aŭtamabil Toyota Yaris, što stajaŭ. Byli śviedki. Adnak mužčyna na ich zaŭvahu nijak nie adreahavaŭ i ź miesca DTZ źjechaŭ, — raspaviali auto.tut.by va Ŭpraŭleńni darožnaj palicyi Litvy.
Vidavočcy avaryi vyklikali palicyju. Hyundai daloka źjechać nie paśpieŭ — palicejskija zatrymali jaho ŭ dvary susiedniaha doma na vulicy Ukmierhies. U aŭtamabili znachodziŭsia 44-hadovy daradca pasolstva Biełarusi ŭ Litvie, što, jak miarkujuć, i kiravaŭ aŭtamabilem. Dypłamat admoviŭsia praviaracca na ćviarozaść.
— Sapraŭdy, incydent byŭ — heta było niaznačnaje DTZ. Ale naš supracoŭnik nie chavaŭsia ź miesca avaryi — jon adjechaŭ mietraŭ dvaccać dla taho, kab nie pieraharodžvać vyjezd i čakaŭ palicyju, jakaja prybyła i skłała pratakoł, — prakamientavali DTZ u Pasolstvie Biełarusi ŭ Litvie. — Kiroŭca-dypłamat byŭ ćviarozy, choć i admoviŭsia prajści ahlad — mieŭ na heta poŭnaje prava.
Karać u pasolstvie svajho supracoŭnika nie stanuć — jon budzie raźbiracca, jak naležyć pa zakonie, z uładalnikam paškodžanaha Toyota Yaris.
