Da 100-hodździa Biełaruskaj Narodnaj Respubliki «Art Siadziba» i «Śpieŭny schod» prezientujuć pieršyja ŭ historyi Biełarusi arkiestravyja fanahramy i karaokie-viersii nacyjanalnych himnaŭ Biełarusi «My vyjdziem ščylnymi radami» i «Pahonia».
Spadziajemsia, što heta stanie dobrym pačatkam biełaruskaha śpieŭnaha karaokie.
Biełaruskija muzyki Siaržuk Doŭhušaŭ i Alaksandar Jasinski padrychtavali dźvie arkiestravyja fanahramy himna Biełaruskaj Narodnaj Respubliki na słovy Makara Kraŭcova «My vyjdziem ščylnymi radami» i patryjatyčnaha himna na słovy Maksima Bahdanoviča «Pahonia» da śviatkavańnia 100-hodździa abviaščeńnia niezaležnaści Biełaruskaj Narodnaj Respubliki.
Aŭtar idei i padrychtoŭki — kiraŭnik «Śpieŭnaha schodu» Siaržuk Doŭhušaŭ. Aŭtarskija aranžyroŭki i zapis zrobleny ŭ Prazie kampazitaram i muzykam Alaksandram Jasinskim. Aŭtar karaokie-viersij — Źmicier Vajnoŭski.
30 kastryčnika 1919 h. byŭ apublikavany vierš Makara Kraŭcova «My vyjdziem ščylnymi radami», muzyku da jaho napisaŭ kampazitar i chormajstar Uładzimir Teraŭski. Vierš Makara Kraŭcova, viadomy taksama pad nazvaj «Vajarski marš».
Hety himn BNR z peŭnymi cenzurnymi praŭkami pa pieršym časie dazvalałasia vykonvać i ŭ BSSR, ale niadoŭha. Paźniej Teraŭskaha aryštujuć i rasstralajuć u 1938-m, Kraŭcova zakatujuć u turmie na hod paźniej. Bolš za 70 hadoŭ tvor hučaŭ tolki ŭ emihracyi. Na Radzimie pra marš zhadali ŭžo ŭ 1991 hodzie — Vasil Bykaŭ, Aleś Adamovič, Ryhor Baradulin vysoŭvali jaho na dziaržaŭny himn, ale prapanova nie prajšła.
Padrabiaznuju historyju hetaha tvora čytajcie tut.
Vierš Maksima Bahdanovičava «Pahonia» napisany ŭ 1916 hodzie ŭ Minsku. Upieršyniu prahučaŭ u «Biełaruskaj chatcy» — minskim kłubie biełaruskaj mastackaj intelihiencyi, jaki ŭ 1916—1920 hh. pravodziŭ kulturna-aśvietickuju rabotu, prapahandavaŭ biełaruskaje teatralnaje muzyčnaje mastactva, sadziejničaŭ stvareńniu biełaruskaha dziaržaŭnaha teatra.
Muzyku da heta vierša napisali šmatlikija kampazitary ŭ roznyja časy — Mikoła Ravienski, Mikoła Ščahłoŭ-Kulikovič, Alaksiej Turankoŭ, Uładzimir Mulavin. U karaokie-viersii vykarysta muzyka biełaruskaha kampazitara Mikoły Ščahłova-Kulikoviča.
Aŭtarskija aranžyroŭki himnaŭ «Pahonia» i «My vyjdziem ščylnymi radami» kampazitara i muzykanta Alaksandra Jasinskaha.
Śpieŭnik z tvorami, jakija buduć vykonvacca 25 sakavika na «Śviacie Niezaležnaści» ŭ Minsku.
25 sakavika ŭ Minsku na płoščy kala Vialikaha teatra opiery i baleta adbudziecca maštabny fiestyval da 100-hodździa abviaščeńnia niezaležnaści Biełaruskaj Narodnaj Respubliki «Śviata Niezaležnaści». Mierapryjemstva aficyjna dazvolena Minharvykankamam.
Poŭnaja prahrama i ŭsie padrabiaznaści tut.
Buklet da 100-hodździa BNR z duchoŭnym himnam Biełarusi «Mahutny Boža».
Uładzimir Teraŭski (1871-1938) kulturna-hramadski dziejač, kampazitar, inicyjatar i kiraŭnik Dziaržaŭnaha biełaruskaha choru, udzielnik biełaruskaha nacyjanalna-relihijnaha ruchu 20 st., stvaralnik adnaho ź pieršych biełaruskich charavych kalektyvaŭ — Minski biełaruski chor. Teraŭski stajaŭ la vytokaŭ stvareńnia nacyjanalnaj opiery i nacyjanalnaj muzyčnaj škoły.
Naradziŭsia pad Słuckam. Atrymaŭ duchoŭnuju adukacyju ŭ Słucku i Miensku. Braŭ udzieł u arhanizacyi kulturna-aśvietnaha asiarodka pry «Biełaruskaj chatcy». Vosieńniu 1919 h. pa zaprašeńni Usievałada Ihnatoŭskaha, rektara Mienskaha piedahahičnaha instytuta, pracavaŭ lektaram na nastaŭnickich kursach.
U historyi biełaruskaha teatralnaha mastactva 20 st. viadomy jak aŭtar muzyki da pjes i teatralnych pastanovak pavodle tvoraŭ Michasia Čarota. Stvaryŭ muzyku da mnohich śpiektaklaŭ, napisaŭ pieśni i ramansy na słovy Janki Kupały, Jakuba Kołasa, Źmitraka Biaduli. Zapisvaŭ i harmanizavaŭ narodnyja pieśni, častka jakich apublikavana ŭ zbornikach «Biełaruski śpieŭnik z notami na try hałasy pavodle narodnych miełodyj», «Biełaruski lirnik», «Vajskovy zbornik».
Supracoŭničaŭ ź Pieršym biełaruskim tavarystvam dramy i kamiedyi, z mastackaj trupaj «Biełaruski narodny teatr» pad kiraŭnictvam Franciška Alachnoviča. Zahadčyk muzyčnaj častki i chormajstar Pieršaha biełaruskaha dziaržaŭnaha teatra.
Praśledavaŭsia savieckimi ŭładami. Aryštavany 23.09.1921 u Miensku pa sfabrykavanaj mienskaj ČK spravie. Byŭ pryhavorany da rasstrełu, jaki zamianili na 5 hadoŭ turmy, byŭ rasstralany ŭ 1938 h.
Pakłaŭ na muzyku vierš Makara Kraŭcova «Vajacki marš», jaki ŭ historyi niezaležnickaha ruchu staŭ nacyjanalnym himnam.
Noty biełaruskich nacyjanalnych himnaŭ «Mahutny Boža», «Pahonia», «My vyjdziem ščylnymi radami».