Biaśpieku na śviatkavańni stahodździa BNR la Opiernaha teatra ŭ Minsku zabiaśpiečvali niekalki socień milicyjanieraŭ i kala 40 družyńnikaŭ na dabraachvotnaj asnovie. Častka ź ich — heta kolišnija fihuranty «spravy patryjotaŭ».
Družyńniki dziejničali ŭ kaardynacyi ź milicyjaj: u pryvatnaści, asobnaja hrupa navat načavała la Opiernaha ŭ noč na niadzielu — pa praviłach biaśpieki, heta abaviazkovaje patrabavańnie.
Ilustracyjnaje fota.
A jak usio prajšło ŭ asnoŭny dzień śviatkavańnia?
«Vyvieli čatyroch pjanych i dvuch pravakataraŭ, jakija pavodzili siabie nieadekvatna. U astatnim usio prajšło roŭna, biez ekscesaŭ. Zapomniŭsia chiba što momant, kali ŭvahu družyńnikaŭ pryciahnuli dvoje amapaŭcaŭ, jakija stajali i łuskali siemki, plavali na ziamlu. My padumali, što heta niepryhoža, pieradali aficerskamu składu. Niechta z načalstva da ich padyšoŭ i zrabiŭ zaŭvahu, tyja łuskać pierastali. Nu i ŭsio», — raskazaŭ nam adzin z družyńnikaŭ.
Adzin z kaardynataraŭ mierapryjemstva Eduard Palčys, dadaje, što la samoj Opiery ŭsio prajšło spakojna.
«Da tych milicyjanieraŭ, što pracavali na Opiery, pretenzij niama — usio było karektna. Mnohija z uśmieškaj vinšavali ludziej u adkaz. A tyja bryhady, jakija zatrymlivali ludziej u inšych miescach i haradach… Ja nie viedaju, chto im addavaŭ zahady», — skazaŭ Palčys.
Jon taksama raskazaŭ, što asobnym ludziam družyńniki zabaranili padychodzić da sceny.
«Heta byli aktyvisty «Alternatyvy», jakija pryjšli sa svaimi ściahami, chacia było ahavorana, što abychodzimsia biez takoj simvoliki. Ich prapuściła milicyja z hetaj simvolikaj, tamu nie vyhaniać ža. Prosta papiaredzili, kab blizka da sceny nie padychodzili, trymalisia dalej.
Ci byli pytańni da asobaŭ družyńnikaŭ? Ja dumaju, tam usie adzin adnaho daŭno viedajuć. Zrešty, naŭrad ci ŭmoŭny Hryščanka [Maksim Hryščanka, namieśnik načalnika milicyi hramadskaj biaśpieki HUUS Minharvykankama] nie razumieŭ sfabrykavany charaktar «spravy Biełaha Lehijona», kab bačyć u chłopcach niejkich sumnieŭnych elemientaŭ. U nas absalutna supadała pazicyja, što nielha dapuścić niejkich kanfliktaŭ unutry. I milicyja, i družyna z hetym spravilisia», — padsumavaŭ Palčys.
