Mastackaja rada Minharvykankama zaćvierdziła vyhlad miemaryjalnaj doški ŭ honar 100-hodździa BNR. Ale dazvołu na ŭstanoŭku pamiatnaha znaku na budynku na vulicy Vaładarskaha, 9, dzie była abvieščana niezaležnaść BNR, dahetul niama, piša Radyjo Svaboda.
Akramia ŭchvały mastackaj rady, nieabchodny jašče i dazvoł na praviadzieńnie masavaha mierapryjemstva. Sajuz mastakoŭ padaŭ aficyjnuju zajaŭku ŭ Minharvykankam. Adkazu pakul niama, paviedamiŭ Svabodzie skulptar Ihar Zasimovič.
«Na maju dumku, Minharvykankam prosta ciahnie čas, jak heta było i z uchvaleńniem prajektu. Mierkavałasia, što memaryjalnuju došku paviesiać napiaredadni 25 sakavika, ale mastackaja rada Minharvykankama nijak nie mahła sabracca da jubileju, a na pieršym pasiedžańni paśla 25 sakavika ŭ płan hetaje pytańnie nie ŭklučyli. Ciapier byccam by stanoŭčaje rašeńnie mastackaj rady jość, vyhlad šyldy ŭchvaleny, ale niama dazvołu na ŭstalavańnie, bo na dumku Minharvykankama, heta masavaje mierapryjemstva. Sajuz mastakoŭ zajaŭku padaŭ, ciapier čakajem. Nie dazvolić paviesić šyldu nie mohuć, ale ciapier prosta marudziać čas», — pierakanany Ihar Zasimovič.
U pres-słužbie Minharvykankama paviedamili, što zajaŭka jość, ale rašeńnie nakont daty ŭstanoŭki šyldy jašče nie pryniataje. Na ŭdakładnialnaje pytańnie, kali Minharvykankam razhledzić zajaŭku Sajuzu mastakoŭ na masavaje mierapryjemstva, adkazu nie było.
