Siońnia ŭ krainie startavała akcyja «Dom biez hvałtu», uvieś nastupny tydzień śpiecyjalisty buduć vyjaŭlać achviar hvałtu, davać im psichałahičnuju i jurydyčnuju dapamohu, piša Tut.by.
Fota: Reuters.
— Heta prablema nie tolki Biełarusi, ale i ŭsiaho śvietu. Kožny hod 100 čałaviek u našaj krainie pazbaŭlajucca žyćcia ŭ vyniku supraćpraŭnych dziejańniaŭ. Užo ŭ hetym hodzie zafiksavana 23 vypadki zabojstva. Heta strašnyja ličby, jakija kažuć pra značnaść prablemy, — zajaviŭ padčas pres-kanfierencyi Aleh Karaziej, namieśnik načalnika hałoŭnaha ŭpraŭleńnia achovy pravaparadku i prafiłaktyki milicyi hramadskaj biaśpieki MUS.
Jon adznačyŭ, nie zaŭsiody ahresara možna pakarać zychodziačy ź siońniašniaha zakanadaŭstva. U kožnym druhim vypadku jon paźbiahaje pakarańnia, i tady ź im supracoŭniki milicyi pravodziać prafiłaktyčnuju hutarku.
Užo nie pieršy hod MUS kaža pra nieabchodnaść novaha zakona «Ab papiaredžańni hvałtu ŭ siamji». Jon vyrazna vyznačyć, kaho možna ličyć ahresaram, jak jaho karać, jak pracavać z achviaraj.
— U krasaviku kancepcyju zakona my nakirujem u dziaržaŭnyja orhany na ŭzhadnieńnie, u červieni-lipieni pradstavim jaje ŭ Saviet ministraŭ. Dalej — ŭzhadnieńnie ź Viarchoŭnym sudom i prakuraturaj, a ŭžo zatym kancepcyja budzie budzie dakładzienaja kiraŭniku dziaržavy. U vypadku jaje ŭchvały, chočacca vieryć, novy zakon budzie pryniaty u 2019 hodzie, — kaža Aleh Karaziej.
Jak tolki dakumient ustupić u zakonnuju siłu, bić dziaciej u našaj krainie budzie zabaroniena. Pa słovach Natalli Lisaviec, psichołaha Haradskoha kliničnaha dziciačaha psichijatryčnaha centra, baćki nie razumiejuć, što ŭčyniajuć da ŭłasnych dziaciej hvałt.