Film «Mściŭcy: Vajna biaskoncaści» ŭžo treci tydzień lidziruje ŭ ZŠA pa kasavych zborach. Hetaja stužka ŭvajšła ŭ piaciorku samych paśpiachovych za ŭsie časy! I moža padniacca jašče vyšej, bo «Park Jurskaha pieryjadu» ŭžo blizka. Kasavyja zbory ŭžo pieravysili $1,6 miljarda.
Pra što ž «Mściŭcy»? Zładziej Tanas maryć sabrać šeść Kamianioŭ Biaskoncaści, kab jahonaja ŭłada stała biaźmiežnaj. U jahonych rukach užo jość Kamień Siły. Ciapier jon maryć zachapić kamieni dušy, času, prastory, realnaści i rozumu. Kali ŭsie jany apynucca ŭ adnaho čałavieka, to skłaści kankurencyju Tanasu nie zmoža nichto.
Tanas — samy mocny, samy hłyboki piersanaž «Mściŭcaŭ». Čamu pa sabie jon pakidaje razruchu i śmierć? Nie, nie tamu, što Tanas pryrodžany sadyst i zabojca.
U jaho jość svaja fiłasofija. Kaliści Tanas (imia pachodzić ad Tanatasa, jaki simvalizavaŭ śmierć u hreckaj mifałohii) padličyŭ: kab vyratavać Suśviet, treba źniščyć roŭna pałovu jaho nasielnictva. Pryčym i tut Tanas maje svoj padychod, jon źniščaje nasielnikaŭ bieź niejkaha adboru na lepšych i horšych, słabych i mocnych, razumnych i durnych. Prosta pałova, kab usim chapała ježy i ziamli. Im ruchajuć vysokija ideały, a sam Tanas miarkuje, što meta apraŭdvaje srodki.
Z novych «Mściŭcaŭ» my daznajemsia, što vołat Tanas zdolny lubić. Jon dastatkova sientymientalny, ale nie demanstruje heta ŭsiamu śvietu.
U astatnim «Mściŭcy» — heta takaja salanka z usimi supierhierojami suśvietu Marvel. Ich tak šmat, što jany pačynajuć zdavacca niedarečnymi i karykaturnymi. Adzinym vyklučeńniem moža być tolki Tor. U astatnim supierhieroi zanadta hanarlivyja, pierasvaranyja, samazakachanyja, naiŭnyja, słabyja. Jany nie mohuć nie vyklikać supieražyvańnia i spačuvańnia, taho patrabuje žanr.
Kali kazać hruba, to supierhieroi niečym nahadvajuć biełaruskuju apazicyju, jakaja nijak nie moža abjadnacca suprać Tanasa. Doktar Strendž praličvaje 12 miljonaŭ varyjantaŭ taho, jak mohuć raźvivacca padziei dalej. I siarod ich jość tolki adzin pieramožny…
