Aŭtar źviartaje ŭvahu na toje, što biełaruska-rasijskija i biełaruska-zachodnija adnosiny nie prostyja, i za kožnaj novaj chvalaj ich abvastreńnia Łukašenka patrabuje ad čynoŭnikaŭ aktyvizavać supracoŭnictva z krainami «dalokaj duhi».
U pieršyja hady prezidenctva heta prajaŭlałasia navat u bolšaj stupieni — tady Łukašenka pazicyjanavaŭ siabie jak antyzachodniaha lidara. Lenta.ru nahadała, što ŭ pačatku 2000-ch Łukašenka siabravaŭ z Sadamam Chusejnam i navat prapanavaŭ jamu palityčny prytułak. Taksama siabroŭskija adnosiny byli ŭ kiraŭnika Biełarusi i z Muamaram Kadafi i Fidelem Kastra.
Takija kantakty biełaruskaha kiraŭnictva aŭtar tłumačyć nastupnym čynam:
«Dla biełaruskaj dziaržavy 2000-ja byli vielmi cikavym pieryjadam. Respublika pieražyvała ekanamičny rost, žyćcio ludziej palapšałasia na vačach, va ŭžytak ledź nie ŭvajšoŭ vyraz «biełaruski ekanamičny cud». Usio heta pryviało da hołavakružeńnia ad pośpiechaŭ. Praŭładnyja ekśpierty pačali zajaŭlać, što ŭ Biełarusi źjaviłasia mahčymaść pretendavać na novy, bolš vysoki zamiežnapalityčny status. Hetaja tendencyja asabliva jarka vyjaviłasia na fonie pastupovaha paharšeńnia adnosin z Rasijaj»,
— piša Lenta.ru.
Adnak u Biełarusi tak ničoha nie atrymałasia — arabskija naftavyja manarchii nie žadali surjozna ŭkładvacca ŭ biełaruskuju ekanomiku.
Asobna spyniŭsia aŭtar na biełaruska-vieniesuelskim supracoŭnictvie. Jak jon ličyć, pastaŭki vieniesuelskaj nafty i šmatlikija infrastrukturnyja prajekty byli vyklikany žadańniem znajści alternatyvu rasijskaj nafcie.
«Pradstaŭniki Minska va ŭsie hałasy raspaviadali pra vidavočnuju vyhadu apieracyj z zaakijanskim «čornym zołatam», pry hetym, adnak, admaŭlajučysia adkazvać na pramyja pytańni pra jaho košt. Łukašenka ž nie skupiŭsia na pachvały na adras Čaviesa, jaki, pavodle jaho słoŭ, dapamoh Biełarusi ŭ spravie niepachisnaha adstojvańnia ŭłasnaha suvierenitetu»,
— piša Lenta.ru.
Dalej, uzhadvaje aŭtar, Biełaruś pačała ŭsio ž krok za krokam palapšać adnosiny z Zachadam, a nadziei na ekanamičnuju ekspansiju ŭ krainy «dalokaj duhi» byli pakinutyja. Ale heta nie pieraškadžała Biełarusi handlavać zbrojaj.
Aŭtar śćviardžaje, što biełaruskaja zbroja praź pierakupaŭ traplała ŭ ruki livijskich isłamistaŭ i siryjskich prychilnikaŭ «Isłamskaj dziaržavy»:
«Faktyčna składajecca situacyja, kali zbroja z adnoj krainy Sajuznaj dziaržavy budzie vykarystana suprać sałdataŭ ź inšaj. Ale biełaruskija ŭłady heta, padobna, nie biantežyć»,
— piša aŭtar Lenta.ru.
