Pa vynikach sumiesnaj pravierki HU pa baraćbie z ekanamičnymi złačynstvami kryminalnaj milicyi MUS i Hienprakuratury ŭ dačynieńni da byłoha hiendyrektara «Biełaruśfilma» raspačata kryminalnaja sprava za złoŭžyvańnie słužbovymi paŭnamoctvami (č. 3 art. 424 KK) pry vykarystańni biudžetnych srodkaŭ, vydzielenych Ministerstvam kultury na vytvorčaść poŭnamietražnaha filma «Z 8 Sakavika, Mužčyny», paviedamlaje pres-słužba MUS.
Ustanoŭlena, što ŭ 2012 hodzie pamiž Ministerstvam kultury i «Biełaruśfilmam» była zaklučana damova na sumiesnuju vytvorčaść i vykarystańnie filma «Z 8 Sakavika, mužčyny» ahulnym koštam amal 3 miljony biełaruskich rubloŭ ($1 500 000).
Uładalnikam vyklučnaha prava na film i inšych majomasnych pravoŭ vystupiła Ministerstva kultury, jakoje zatraciła ź biudžetu na vytvorčaść filma bolš za 1 000 000 biełaruskich rubloŭ ($ 500 000), kinastudyja vydzieliła ŭłasnych srodkaŭ amal 1 000 000 biełaruskich rubloŭ ($ 500 000).
U svaju čarhu, u krasaviku 2013 hoda były hienieralny dyrektar nacyjanalnaj kinastudyi ad asoby kinastudyi zaklučaje dahavor na vytvorčaść filma z rasijskim subjektam TAA «Maskit», jakim inviestavana ŭ stvareńnie filma bolš za 1 000 000 rubloŭ ($ 500 000), adznačajecca ŭ paviedamleńni MUS.
Paśla kiraŭnik kinastudyi, złoŭžyvajučy słužbovymi paŭnamoctvami, naŭmysna zaklučyŭ u kastryčniku 2013 hoda damovu z treciaj asobaj (taksama rasijski subjekt haspadarańnia) na kinateatralny pakaz nazvanaha filma na terytoryi ŭsiaho śvietu, a ŭ studzieni 2014 hoda padpisaŭ dadatkovaje pahadnieńnie ab pieradačy im vyklučnaha prava na film.
Pry hetym padazravany zahadzia viedaŭ, što pravaŭładalnikam filma «Z 8 Sakavika, mužčyny» na toj momant źjaŭlałasia Ministerstva kultury Respubliki Biełaruś i tolki ź lipienia 2014 hody paśla padpisańnia akta pryjomki filma kinastudyja atrymaje biazvypłatna vyklučnaje prava na jaho, z abaviazkovaj umovaj ab nakiravańni prybytku ad vykarystańnia filma na raźvićcio filmavytvorčaści z nastupnym pradastaŭleńniem štohadovych spravazdač ŭ Ministerstva kultury.
Takim čynam, były dyrektar RUP «Nacyjanalnaja kinastudyja «Biełaruśfilm», budučy słužbovaj asobaj, jakaja zajmaje adkaznuju pasadu, svaimi dziejańniami pryčyniŭ istotnuju škodu dziaržaŭnym i hramadskim intaresam,
što vyjaviłasia ŭ stracie ministerstvam i kinastudyjaj pravoŭ na samastojnaje vykarystańnie filma na terytoryi ŭsich krain śvietu, pryčynieńni strat u vyhladzie nieatrymańnia prybytku ad kamiercyjnaha vykarystańnia filma.
Z červienia 2011 pa pačatak 2015 hoda «Biełaruśfilm» uznačalvaŭ Aleh Silvanovič.
