Za 50 metraŭ ad kurapackaha memaryjału ŭ kompleksie budynkaŭ, jaki raniej atrymaŭ nazvu «Bulbaš-choł» i naležyć kampanii «BiełRestInvest», naprykancy tydnia maje adkrycca restaran «Pajedziem, pajadzim», piša Radyjo Svaboda.
U restaracyi, dzie pabyvaŭ karespandent Svabody, poŭnym chodam idzie padrychtoŭka da adkryćcia, choć ni na budynku, ni na aharodžy niama nijakich šyldaŭ i infarmacyi.
U zali ŭžo hatovyja interjery, stajać stały i łaŭki, muzyčnaja aparatura. Rasstaŭlajuć butelki sa śpirtovymi napojami. U centry zali kala barnaj stojki vializnaja reklama harełki «Bulbaš'».
Administratarka restaracyi Vitalija skazała Svabodzie, što ŭsia zala raźličanaja prykładna na 300 naviednikaŭ. Da vosieni planujecca adčynić łaźniu i saŭnu.
Inšych źviestak u administracyi nie paviedamili, prapanujučy dačakacca adkryćcia ŭ piatnicu.
Paśla taho jak karespandent Svabody vyjšaŭ z zali restaracyi, nieviadomy, jaki nie pradstaviŭsia, z pahrozami zapatrabavaŭ vydalić z telefona fatazdymki, zroblenyja znutry i zvonku pamiaškańnia. Maŭlaŭ, heta pryvatnaja terytoryja.
Jašče adna žančyna, jakaja nie nazvałasia, vykazała niezadavalnieńnie paviedamleńniami medyja pra zabaŭlalny kompleks — tym, što žurnalisty «pišuć pra tancy na kaściach».
Kiraŭnica adździełu handlu Mienskaha rajvykankamu Taciana Ivanova paćvierdziła karespandentu Svabody, što na terytoryi kompleksu budzie restaracyja «Pajedziem, pajadzim».
«Jany ŭžo daŭno ŭklučanyja ŭ handlovy rejestar, ale nie mahu skazać, kali źbirajucca adčynicca. Jany licenziju atrymali, usie dakumenty aformlenyja», — skazała Taciana Ivanova.
Taksama ŭ rajvykankamie skazali, što nia majuć infarmacyi, kali adčynicca restaracyja.
«Saŭna i łaźnia ni ŭ jakija rejestry nia ŭklučanyja, uklučany tolki abjekt hramadzkaha charčavańnia», — skazała Taciana Ivanova.
Uładalnik kompleksu: «Čamu vas aburaje TAA «Bulbaš»
Znachodzicca restaracyja pa adrasie Baraŭlanski sielski saviet, 55, rajon vioski Drazdova.
Kompleks naležyć kampanii «BiełRestInvest». Parazmaŭlać ź jaje dyrektaram Andrejem Jarmolenkavym nie atrymałasia.
«Usio aficyjna. Čytajcie na sajtach, reklama jość, — skazaŭ jon Svabodzie praz telefon. — Kala lesu znachodzicca Bigzz, i što? Zrabicie tam interviju. A čamu vas aburaje TAA «Bulbaš», ja nie razumieju?»
U śniežni 2017 Jarmolenkaŭ paćvierdziŭ «Biełsatu», što jość ułaśnikam «abjektu na 51-m kiłamietry», jaki jon zdaje ŭ arendu pradpryjemstvu TAA «Aniśbieł». Kiraŭnik «Aniśbieła», što vałodaje maleńkim baram i kramaj sadaviny ŭ Miensku, zajaviła žurnalistam, što ničoha nia čuła pra abjekt na 51-m km MKAD.
Raniej internet-staronka budučaha «Bulbaš-chołu» źjaviłasia na sajcie chołdynhu «Naša restarannaja hrupa» («Biełnavateks hrup»), što vałodaje siarod inšaha raskošnymi mienskimi restaranami «Hrand Kušaviel» i The View.
«My na siońnia nijakich adnosinaŭ da hetaha nia majem i kamentaroŭ nie dajom», — skazaŭ Svabodzie ŭ studzieni 2018 dyrektar chołdynhu Ihar Varabjoŭ.