Žančyna, jakaja pažadała zastacca ananimnaj, raskazała nam: «Płanuju letam jechać na adpačynak va Ukrainu. Kab padstrachavacca, pryjšła ŭ Horackuju palikliniku i spytała, ci možna mnie zahadzia pryščapicca, a tam skazali, što vakcyny ŭ balnicy niama ŭžo miesiac! I kali źjavicca — jany nie viedajuć».
Pryščepku ad adru zvyčajna robiać u dziacinstvie: u 1 hod i 6. I daznacca, ci rabili ich vam, možna pa miescy žycharstva. Ale čaściakom vyśvietlić heta dakładna niemahčyma. I ŭ takim vypadku daktary rajać darosłym vykanać pryščeplivańnie nanoŭ.
Praŭda, jak vyśviatlajecca, zrabić heta pa miescy žycharstva apieratyŭna možna daloka nie va ŭsich rehijonach krainy.
U Horackim rajonnym centry i epidemijałohii nam paćvierdzili, što sapraŭdy pieraboj z vakcynaj maje miesca:
«Dla dziaciej vakcyny majucca, a voś dla darosłych — nie. Abiacali, što vakcyna APK (suprać adru, krasnuchi i paratytu) budzie ŭ mai, ale miesiac užo zakančvajecca. Dumajem, heta tamu, što była ŭspyška zachvorvańniaŭ u Vaŭkavysku, i ŭsie preparaty, chutčej za ŭsio, Minzdaroŭja nakiravała tudy», — raskazaŭ «NN» śpiecyjalist centra, dadaŭšy, što, kali vakcyna źjavicca, to pra heta abaviazkova paviedamiać u miascovych ŚMI.
Hałoŭny doktar Horackaj centralnaj rajonnaj balnicy Śviatłana Biazzubienka navinie adsutnaści ŭ ich vakcyny była ździŭlenaja:
«Ščyra kažučy, mnie nichto pra heta nie kazaŭ. Ja tolki vyjšła z adpačynku, viedaju, što zajaŭka na vakcyny była padadzienaja, a kali jaje nie vykanali — heta pytańni da respubliki». U kancy razmovy doktar paabiacała vyśvietlić hety momant.
My patelefanavali i na «respubliku». Namieśnica hałoŭnaha doktara Respublikanskaha centra hihijeny, epidemijałohii i hramadskaha zdaroŭja Iryna Hlinskaja navat nie pavieryła, što takaja situacyja ŭvohule moža być: «Niejkaja łuchta! Jak takoje moža być? Realnyja situacyi, kali vakcyny niama dzień ci dva, ale nie miesiac. Pryviadu prykład. Na dniach patelefanavała ŭ Minzdaroŭja žančyna sa Žłobina i paskardziłasia, što ŭ ich horadzie taksama niemahčyma zrabić pryščepku. My razabralisia z hetaj situacyjaj i vyśvietliłasia, što jana pryjšła ŭ balnicu ŭ toj dzień, kali vakcyny sapraŭdy nie było, ale jana źjaviłasia litaralna praź dzień. Sprava ŭ tym, što vakcyny dla darosłych prychodziać nievialikimi partyjami. I kali pryščepka patrebnaja terminova, to ludziej zapisvajuć u śpis i ŭžo sychodziačy z zapytu farmirujuć zajaŭku. Apaśla zaprašajuć tych, chto źviarnuŭsia ŭ palikliniku, pryščapicca». Iryna Hlinskaja zavieryła, što «va ŭsich rehijonach krainy vakcyny dastatkova».
Užo paśla našych zvankoŭ i ŭ Respublikanskim centry hihijeny, epidemijałohii i hramadskaha zdaroŭja, i ŭ Horackaj balnicy paabiacali, što vakcyna pryjedzie ŭ horad zaŭtra-paślazaŭtra.
«Dla ŭsich darosłych, jakija źbirajucca vyjazdžać za miažu, na siońniašni momant my zakazali 30 doz vakcyny. Kali kamuści treba pryščapicca, viedajcie, što rabić heta treba nie za apošnija dni da adjezdu, bo spačatku treba prajści miedycynski ahlad i atrymać daviedku. Dobra pakłapacicca pra heta chacia b za miesiac da adjezdu», — udakładniła «NN» Śviatłana Biazzubienka.
