Pałata pradstaŭnikoŭ pryniała ŭ druhim čytańni zakon «Ab masavych mierapryjemstvach» u Respublicy Biełaruś. Suprać hałasavali dvoje — deputatki Alena Anisim i Hanna Kanapackaja, piša Radyjo Svaboda.
Razhlad zakonaprajektu nie zaniaŭ i dziesiaci chvilin. Namieśnik staršyni kamisii Pałaty pradstaŭnikoŭ pa pravach čałavieka, nacyjanalnych adnosinach i srodkach masavaj infarmacyi Valer Saŭko vystupiŭ pierad deputatami z charaktarystykaj zakonu. Pytańniaŭ jamu nie zadavali.
Kali paraŭnoŭvać kančatkovy varyjant z varyjantam 1-ha čytańnia, to pryncypovych źmienaŭ u im amal niama. Adzinaja istotnaja źmiena tyčycca pradstaŭnikoŭ ŚMI. U pryvatnaści, kali raniej było prapisana, što pry aśviatleńni masavych mierapryjemstvaŭ žurnalist pavinien mieć albo nadpis «Presa», albo niejkuju narukaŭnuju paviazku, to ŭ novaj redakcyi prapisana, što žurnalist musić mieć pry sabie jasna bačny znak adroźnieńnia. Što tyčycca inšych prapanoŭ, jakija ŭnosili pravaabaroncy, to ŭ zakonaprajekcie jany nie byli zafiksavanyja.
Na pytańnie, čamu, naprykład, nie dazvolena aśviatlać mierapryjemstvy nia tolki štatnym, a i pazaštatnym supracoŭnikam ŚMI, Valer Saŭko adkazaŭ, što sprava ŭ tym, što «nia ŭsie pazaštatnyja karespandenty majuć paśviedčańni, i my staralisia zrabić tak, kab nie stvarać arhanizataram mierapryjemstvaŭ dadatkovych składanaściaŭ».
Ciapier zakon budzie pieradadzieny na razhlad u Saviet Respubliki, a adtul na podpis Alaksandru Łukašenku.