Rasijski «Kommiersant» paviedamlaje, što rasijskija ŭłady vydali sakretny zahad ab źniščeńni archiŭnych dakumientaŭ ź infarmacyjaj pra represavanych u SSSR.
Pra heta dyrektar Muzieja historyi HUŁAHa Raman Ramanaŭ paviedamiŭ daradcy prezidenta Rasii Michaiłu Fiadotavu, paprasiŭšy jaho razabracca ŭ situacyi. Źniščeńnie kartak aznačaje poŭnaje vydaleńnie infarmacyi pra znachodžańnie asudžanych u sistemie HUŁAHa. Jak zajaviŭ Fiadotaŭ, zachavańnie dakumientaŭ, jakija adnosiacca da hetaha pieryjadu historyi, vielmi važnaja zadača.
Ramanaŭ rastłumačyŭ, što daśledčyki minułaha atrymali adkazy z MUS, u jakich havaryłasia ab źniščeńni archiŭnych ŭlikovych kartak asudžanych.
«U vypadku kali źniavoleny pamiraŭ abo hinuŭ u łahiery, jaho asabistaja sprava adpraŭlałasia na biesterminovaje zachoŭvańnie, — rastłumačyŭ Ramanaŭ. — A kali čałaviek vyzvalaŭsia, to jaho sprava źniščałasia, ale składałasia archiŭnaja kartka, dzie ŭkazvalisia imia, hod i miesca naradžeńnia, pieramiaščeńnie źniavolenaha pamiž łahierami i łahiernymi punktami, a taksama data vyzvaleńnia». Ab praktycy źniščeńnia kartak daviedaŭsia adzin z partnioraŭ muzieja, daśledčyk Siarhiej Prudoŭski. Hetaj viasnoj jon šukaŭ infarmacyju pra represavanaha sielanina Fiodara Čazava, čyj brat Ryhor vyžyŭ paśla rasstrełu, zmoh dajści ŭ 1938 hodzie da staršyni Usierasijskaha CVK Michaiła Kalinina i znoŭ byŭ adpraŭleny na rasstreł. Fiodar Čazaŭ byŭ asudžany na piać hadoŭ łahieraŭ i vysłany ŭ Mahadanskuju vobłaść.
Daradca prezidenta Rasii Michaił Fiadotaŭ zajaviŭ «Kommiersantu», što vyvučyć prablemu.
