Staŭleńnie ŭładaŭ Respubliki Biełaruś da toj ci inšaj źjavy možna vyznačyć pa dziejańniach, jakija jany pradprymajuć. U vypadku pratestaŭ suprać «Pajedziem pajadzim» faktam stali 52 pratakoły ab pravaparušeńniach, składzienyja na pratestoŭcaŭ, jakija sprabujuć błakavać prajezd naviednikaŭ da restarana.
Nahadajem, što ministr unutranych spraŭ Ihar Šunievič zajaviŭ: «Jość rašeńnie ŭłady ab vydačy ziamli ŭstanovie, jość sama ŭstanova, jość hramadski paradak», — choć i ŭchiliŭsia ad pramoha adkazu na pytańnie, jak buduć dziejničać jahonyja padnačalenyja.
Pratestoŭcaŭ nie razhaniajuć, ale sprabujuć vydušyć ź placoŭki štrafami.
Čytajcie taksama: Źmicier Daškievič: Nam treba krytyčna acanić svaje siły ŭ supraćstajańni z bulbašžoram
Siarod ludziej, na jakich skłali pratakoły, palityk Pavieł Sieviaryniec (11 pratakołaŭ), žychar Łahojska Dzianis Urbanovič (7 pratakołaŭ), žycharka Minska Natalla Haračka (6 pratakołaŭ). Inšyja «zapratakalavanyja» — palityki Aleś Łahviniec, Alaksiej Janukievič, Ryhor Kastusioŭ, žychar Vilejki Alaksiej Siudak, žychary Minska Juraś Čavusaŭ, Aleś Taŭstyka, Leanid Kułakoŭ, Valer Rabcaŭ, Dzianis Kraŭčuk, Maja Navumava, Kaciaryna Andrejeva, Siarhiej Aniankoŭ, Aleh Korban, Anatol Mirašničenka, Źmicier Kazakievič, Vital Paŭłaŭ, Aleś Turovič, Jaŭhien Batura, Dzianis Sadoŭski, Volha Nikałajčyk dy inšyja. Usie hetyja zachady fiksujuć pravaabaroncy-viasnoŭcy.
Pratakoły składalisia pa artykułach 17.1 (drobnaje chulihanstva), 23.4 (niepadparadkavańnie zakonnamu patrabavańniu słužbovaj asoby), 18.34 KaAP (znachodžańnie na prajeznaj častcy), 23.34 (udzieł u niesankcyjanavanym masavym mierapryjemstvie) dy inšych.
Ziamlu pad zabaŭlalny centr la MKADa kala miesca masavych rasstrełaŭ hramadzian u 1937—1941 hadach Minski rajvykankam vydzieliŭ u kancy 2000-ch. U 2012 namieśnik hienprakurora rekamiendavaŭ uładam Minskaha rajona i vobłaści spynić budaŭnictva i ŭkazvaŭ na parušeńni pry vydzialeńni ziamli, ale kiraŭniki Minskaj vobłaści praihnaravali hety zvarot. Naadvarot, pry ministru Śviatłovie Ministerstva kultury zaćvierdziła takija miežy achoŭnych zon vakoł Kurapat, pry jakich restaran moh zastavacca stajać.
Zbudavany restaran nazvali spačatku «Bulbaš-chołam», ale ŭ vyniku hramadskich pratestaŭ tak i nie adkryli, jon prastajaŭ 4 hady pustym. Novaja sproba adkryć jaho adbyłasia hetym letam. Praciŭniki hetaha dziažurać na placoŭcy kala zabaŭlalnaha centra, infarmujuć ludziej pra Kurapaty i błakujuć bramu kompleksu. Jany taksama sprabavali kryžami zabłakavać palavy padjezd da miesca zabaŭ.
U Kurapackim lesie u brackich mahiłach lažać pareštki dziasiatkaŭ tysiač ludziej, rasstralanych savietami.
Ludzi patrabujuć pieranieści ci pieraprafilavać budynki «Pajedziem pajadzim». Z asudžeńniem adkryćcia restarana vystupili šmatlikija intelektuały i hramadskaja dziejačy — ad Śviatłany Aleksijevič da Mikałaja Čarhinca i Viačasłava Kiebiča. Ź imi salidaryzavalisia biznesoŭcy Juryj Zisier i Viktar Prakapienia. Adnak ułady pakul nie zrabili nijakich krokaŭ pa praviercy zakonnaści vydzialeńni placu pad zabudovu.
Čytajcie taksama:
«Kvoty pieravykanany»: kašmarnyja archiŭnyja dakumienty pra 1937 hod u Biełarusi
Haspadar skandalnaha restarana ŭ Kurapatach — 54-hadovy biznesmien Leanid Zajdes
Skandał u Kurapatach: kolišniaja televiadučaja BT i jaje muž-biznesmien najechali na aŭto na dvuch pikietoŭcaŭ
Prakuratura patrabavała ad Batury spynić budaŭnictva «Bulbaš-choła», ale toj nie spyniŭ
