Takaja infarmacyja prychodzić z kułuaraŭ mižnarodnaj kanfierencyi «1918 hod u Litvie i Polščy z punktu hledžańnia ciapierašniaj Centralnaj i Uschodniaj Jeŭropy: historyja, palityka, kultura», jakaja prachodzić u Vilni.
Jašče naprykancy minułaha leta ŭ Vilni na hary Hiedymina byli znojdzienyja pareštki, jakija mierkavana mahli naležyć kiraŭniku paŭstańnia 1863 hoda na terytoryi Litvy i Biełarusi Kastusiu Kalinoŭskamu.
«Majecca dastatkova dokazaŭ taho, što siarod vyjaŭlenych astankaŭ jość pareštki i Kanstancina Kalinoŭskaha», — kazaŭ BNS prafiesar Kafiedry anatomii, histałohii i antrapałohii Vilenskaha ŭniviersiteta Rymantas Jankaŭskas.
Uvieś hety čas litoŭskija śpiecyjalisty šukali svajakoŭ Kalinoŭskaha, kab vyjavić, ci pierad imi astanki Kastusia. Toj samy Jankaŭskas kazaŭ, što było b dobra, kab biełaruskija ŭłady dazvolili ekshumavać cieła brata Kanstancina Viktara, jaki pachavany na terytoryi našaj krainy.
Šukalisia i inšyja svajaki Kalinoŭskaha, kab moh pravieścisia hienietyčny analiz. Mahčyma, jon daŭ vyniki.
Nieaficyjna adznačajecca, što pierapachavańnie Kastusia Kalinoŭskaha moža adbycca ŭžo 6 lipienia na mohiłkach Rosa. Bližejšym časam u Litvie moža adbycca pres-kanfierencyja z hetaj nahody.
Nie tak daŭno ŭ Vilni taksama byli znojdzienyja pareštki inšaha paŭstanca — Zyhmunta Sierakoŭskaha. U tym, što heta Sierakoŭski, amal niama sumnievaŭ, bo byŭ znojdzieny jahony zaručalny piarścionak.
Kastuś Kalinoŭski — lidar paŭstańnia 1863—1864 hadoŭ na terytoryi Biełarusi i Litvy. Jahonymi namahańniami vydavałasia hazieta na biełaruskaj movie «Mužyckaja praŭda».
Kalinoŭski byŭ paviešany 22 sakavika 1864 hoda ŭ Vilni na Łukiškach. Jamu było 26 hadoŭ.
Kastuś Kalinoŭski staŭ adnym ź simvałaŭ zmahańnia biełarusaŭ za ŭłasnuju niezaležnaść i identyčnaść. Na siońnia Kalinoŭskaha maluje moładź na hrafici, majkach, nabivaje tatuiroŭki. U Minsku idzie zbor podpisaŭ za adkryćcio pomnika hieroju.
Čytajcie taksama: