Žurnalist maskoŭskaha vydańnia «Novyje iźviestija» pakryŭdziŭsia na biełarusaŭ: maŭlaŭ, ruskich «abuvajuć» na miažy. A pryčynaj stała ŭsiaho tolki patrabavańnie spłacić pierad vyjezdam z krainy štrafy za pieravyšeńnie chutkaści.

«Vyjazdžajučy ŭ pačatku červienia ŭ Biełaruś, ja śpiecyjalna pahladzieŭ forumy aŭtaamataraŭ, dzie byvałyja jezdaki pramym tekstam paviedamlali: haniać u susiedniaj dziaržavie možacie jak dušy zaŭhodna, pakolki štrafy ź videakamier u Rasiju nie prychodziać, — jany, maŭlaŭ, tolki dla miascovych. Tym bolš što jeździć pa trasie, jakaja viadzie ŭ Jeŭropu, adno zadavalnieńnie. U adroźnieńnie ad rasijskaha ŭčastka darohi Maskva-Brest, na biełaruskaj — vielizarnaja raździalalnaja pałasa i šyrokija abočyny. Nie daroha, a ŭźlotnaja pałasa, na jakoj i 180 km na hadzinu zdajucca zusim nie biaźmiežnaj ryzykaj!» — piša žurnalist Siarhiej Lvoŭ.

Voś tolki «pahaniać jak dušy zaŭhodna» biez nastupstvaŭ nie atrymałasia. Za 500 mietraŭ da miažy mašynu Lvova spynili daišniki i paprasili apłacić parušeńni, jakija trapili na videakamiery. Ich za try dni ŭ rasiejca nabrałosia až 8, ahułam na 243 biełaruskija rubli.

Lvova ździviła, što płacić treba ŭ biełaruskich rublach ci bankaŭskaj kartkaj. Ruskija rubli i inšuju valutu ŭ jaho nie pryniali.

Pryčym, adznačaje jon, razam ź im za štrafy spynili jašče niekalkich kiroŭcaŭ. Pa słovach žurnalista, ź niekatorych kiroŭcaŭ patrabavali hrošy za parušeńni, jakija naźbiralisia za apošnija niekalki hadoŭ tranzitnych pajezdak praź Biełaruś.

Taksama žurnalist ździviŭsia — čamu heta jaho nie papiaredzili pra taki siurpryz pry ŭjeździe ŭ krainu? I raźvioŭ kanśpirałohiju: na jaho dumku, jość i palityčnyja pieradumovy.

«Viadoma, što «baćka» Łukašenka ŭsurjoz pakryŭdziŭsia za niezakonnyja pamiežnyja pasty na ŭjeździe ŭ Rasiju. Nie vyklučana, što pravierka rasijskich mašyn na štrafy — miera ŭ adkaz ź Minska», — piša Lvoŭ.

U DAI Viciebskaj vobłaści kažuć, što ničoha dziŭnaha niama. Pa takoj sistemie praca idzie ŭžo daŭno. Kali na kamieru traplaje mašyna, na jakoj jość parušeńni, praz paru socień mietraŭ jaje spyniać i paprosiać apłacić štrafy. Praŭda, daišniki nie zmahli adkazać, što budzie z kiroŭcam, u jakoha raptam nie chopić hrošaj na apłatu.

Mabilny punkt kantrolu apłaty na trasie M1 pačaŭ svaju pracu jašče ŭ kancy 2017 hoda, raspaviali «Našaj Nivie» ŭ kampanii «Biaśpiečnyja darohi», što zajmajecca sistemaj fotafiksacyi parušeńniaŭ.

Punkty kantrolu apłaty pracujuć va ŭsich abłaściach krainy, na asnoŭnych transpartnych patokach, dzie ruchajucca hości Biełarusi, znachodziacca jany tam pa rašeńni DAI.

Mabilny punkt pakul što tolki adzin na ŭsiu krainu, jon i staić na M1. Jak doŭha jon budzie tam znachodzicca, vyrašać taksama daišnikam.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?