Adździeł idealohii administracyi Savieckaha rajonu Miensku zabaraniŭ žycharam mienskaha Sielhaspasiołku naładzić śviata ŭ skvery Kotaŭka. Žychary navakolnych kvartałaŭ planavali razam sabracca ŭviečary 5 lipienia, paviedamlaje Radyjo Svaboda.
Skver Kotaŭka, archiŭnaje fota.
Jak skazała Svabodzie aktyvistka Maryna Dubina, joj patelefanavaŭ načalnik upraŭleńnia idealahičnaj pracy, kultury i pa spravach moładzi Vital Adamovič i skazaŭ, što na «masavaje mierapryjemstva» nieabchodny dazvoł haradzkich uładaŭ. Inačaj zbor budzie ličycca niezakonnym.
«My ŭ lubym vypadku pryjdziem u skver — prynamsi sustreć tych, chto pryjdzie pa našych abviestkach, — kaža Maryna. — Treba pahutaryć, rastłumačyć im sytuacyju. My sumiesna z žycharami ŭsio robim dziela dobraŭparadkavańnia skveru, užo hod hetym zajmajemsia. I nia ličym, što heta masavaje mierapryjemstva, jakoje patrabuje ŭzhadnieńnia, apłaty milicyi, chutkaj dapamohi i «Zielanbudu».
Ad 18 da 21 hadziny 5 lipienia žychary Kotaŭki źbiralisia dobraŭparadkavać terytoryju, pastavić łavački, naładzić vystavu dziciačych malunkaŭ i zrabić nievialički impravizavany kancert.
«Kali z susiedziami robim subotnik u dvary, sadžajem kusty, klumby — my ž nia prosim u Mienharvykankamu dazvołu, nie apłačvajem achovu susiedziaŭ? Voś i hetym razam nie źbirajemsia rabić niejkuju hlabalnuju budoŭlu, kardynalnaje ŭmiašańnie. I ličym, što dla sustrečy žycharoŭ, jakija chočuć raźvivać skver, niejkaje ŭzhadnieńnie atrymlivać niama patreby».
Pry hetym, kaža Maryna Dubina, na minułym tydni, jak adkaznyja žychary rajonu, jany prainfarmavali administracyju, što chočuć naładzić «subotnik». Stavili čynoŭnikaŭ u viadomaść i pry raniejšych sustrečach z žycharami, kali prybirali, abrazali drevy, macavali špakoŭni. Nijakich pretenzij dahetul nie było.
Hetym razam, jak miarkuje surazmoŭnica, čynoŭnikam mahli nie spadabacca zhadki pra śviata, muzyku i vystavu dziciačych malunkaŭ.
Namieśnica načalnika idealahičnaha ŭpraŭleńnia Natalla Ŭścinovič u razmovie z karespandentam Svabody zapeŭniła, što rajonnyja ŭłady ŭściešanyja, kali žychary samaarhanizujucca i ładziać sumiesnyja imprezy.
Adnak dla «masavych mierapryjemstvaŭ», dzie čakajecca šmat ludziej, usio ž patrebny dazvoł Mienharvykankamu.
Pakolki samastojna takija pytańni administracyja nie vyrašaje, kaža Natalla Ŭścinovič, to zabaranić ničoha nia moža. Moža tolki paraić «nie ryzykavać».
