U Japonii pakarany śmierciu zasnavalnik relihijnaj siekty «Aum Sinrykio» Sioka Asachara, a taksama niekalki kiraŭnikoŭ arhanizacyi (usiaho 13 čałaviek), adkaznaj za najbujniejšy terakt u japonskaj historyi.
U sakaviku 1995 hoda siektanty raspylili atrutny haz zaryn u takijskim mietro (prakałoŭšy pakiety z hazam parasonami), u vyniku čaho zahinuli 13 čałaviek, a atrymali atručvańni roznaj stupieni ciažkaści kala 6 tysiač.
Akramia Asachary pakaranyja Kijochide Chajakava, jaki vykonvaŭ u siekcie rolu vajennaha ministra, a taksama Tamamasa Nakahava i Josichira Inaue.
Usie pryhavory pryviedzieny ŭ vykanańnie praz paviešańnie.
Relihijnaja siekta «Aum Sinrykio» była zasnavana ŭ 1987 hodzie Sioka Asacharaj. Kolkaść, pa roznych źviestkach, dasiahała ad 30 da 50 tysiač čałaviek, ź ich značnaja častka znachodziłasia ŭ Rasii, dzie siektanty viali aktyŭnuju dziejnaść.
Nazva «Aum Sinrykio» aznačaje «Najvyšejšaja iścina» abo «Vučeńnie iściny». Pieršapačatkova jaje eklektyčnaje vučeńnie sumiaščała pryncypy budyzmu i induizmu, a zatym i apakaliptyčnyja chryścijanskija praroctvy.
Zasnavalnik siekty Sioka Asachara (sapraŭdnaje imia - Tadzua Macumota) abviaściŭ siabie adnačasova Chrystom i pieršym čałaviekam, jaki dasiahnuŭ praśviatleńnia, paśla Budy.
Siekta atrymała aficyjny status relihijnaj arhanizacyi ŭ Japonii ŭ 1989 hodzie. Lik paśladoŭnikaŭ imkliva vyras pa ŭsim śviecie.
Pastupova «Aum Sinrykio» pieratvaryłasia ŭ paranoidny kult, jaki prapavieduje chutki nastup kanca śvietu. Adepty siekty śćviardžali, što budzie Treciaja suśvietnaja vajna, paśla jakoj vyžyvuć tolki členy siekty.
Paśla «Aum Sinrykio» stała ŭsio čaściej źviartacca da hvałtu, vykradajučy, źbivajučy i zabivajučy svaich praciŭnikaŭ, čaściakom vykarystoŭvajučy chimičnuju zbroju dla svaich napadaŭ.
U Japonii śmiarotnyja prysudy nie pryvodziacca ŭ vykanańnie da taho času, pakul u dačynieńni da ŭsich abvinavačanych i saŭdzielnikaŭ złačynstva nie pryniata kančatkovaha rašeńnia, a prysud nie projdzie ŭsie apielacyjnyja instancyi.
Apošni sudovy praces u dačynieńni da paśladoŭnikaŭ siekty byŭ zavieršany ŭ studzieni hetaha hoda paśla rašeńnia Viarchoŭnaha suda Japonii, jaki pakinuŭ u sile prysud adnamu z členaŭ «Aum Sinrykio»— jon atrymaŭ pažyćciovy termin.
