51-hadovaja viełapadarožnica z Brazilii Andrea Małafaja de Fihiejredu vyrašyła dać druhi šaniec Biełarusi i znoŭ pryjechała da nas na niekalki dzion. Na hety raz u Hrodna. Ale, jak i ŭ Breście, spačatku jana sutyknułasia ź ciažkaściami pry rehistracyi.
Da niadaŭniaha času Andrea ničoha nie viedała pra Biełaruś, jak i bolšaść brazilcaŭ. Ale ŭ 2017 hodzie ŭ chostele ŭ Ałbanii žančyna paznajomiłasia z Volhaj ź Minska, jakaja jaje natchniła na padarožža ŭ nieviadomuju krainu.
U kancy červienia 2018 hoda Andrea pryjechała ŭ Brest, ale nadoŭha tam nie zatrymałasia dy pakinuła horad zasmučanaj — nichto nie razmaŭlaŭ na zamiežnych movach i nie moh joj ničoha patłumačyć. Jana nie zmahła zarehistravacca ŭ Departamiencie hramadzianstva i mihracyi, a heta abaviazkova.
Padarožnica pajechała ŭ Biełastok i płanavała adtul trapić u Litvu, ale znajomyja ŭhavaryli jaje dać Biełarusi druhi šaniec. 6 lipienia Andrea pryjechała ŭ Hrodna.
«U novym biełaruskim horadzie ja sutyknułasia z tymi ž prablemami, što i ŭ Breście. Heta prablemy z rehistracyjaj, — kaža Andrea. — Kali nie atrymajecca ich vyrašyć, pajedu ź Biełarusi. Ja nie viedaju što rabić i nichto nie viedaje. Ja chaču padarožničać, jak u Jeŭropie i być nie pryviazanaj da niejkaha miesca, ale ŭ Biełarusi heta nie tak — treba rehistravacca».
Andrea spyniłasia ŭ hrodzienskim chostele.
U Biełarusi adčuła siabie dziciom
Adlehłaść, jakuju prajazdžaje Andreja na svaim rovary za dzień, zaležyć ad mnohich faktaraŭ: nastroju, samaadčuvańnia, nadvorja i inšaha. Da Hrodna žančyna pieraadoleła kala 100 km i spyniałasia na Aŭhustoŭskim kanale, kab palubavacca pryhožymi vidami. Padarožnica kaža, što starajecca šukać maleńkija i nieviadomyja harady, pryhožyja miescy, pra jakija mała chto viedaje.
«Za try hady padarožža ja naviedała roznyja krainy, dzieści patrebna była viza, dzieści nie, i nidzie nie było ŭ mianie nijakich prablem, — raspaviadaje Andrea. — U Biełarusi brazilcam viza nie patrebna. I byccam usio pavinna było prajści biez prablem, ale vašy praviły i zakony składzienyja niekarektna i nichto ničoha nie viedaje. Adzin kaža adno, druhi inšaje i pry hetym nichto nie razmaŭlaje na anhlijskaj movie.
Vielmi dziŭna, što ludzi, jakija pracujuć na miažy i ŭ mihracyjnaj słužbie nie havorać na zamiežnaj movie, a na sajcie niama infarmacyi dla zamiežnikaŭ. Mienavita tamu mnie tut było vielmi składana razabracca. U Biełarusi ja adčuła siabie dziciom. I hetaja kraina stała dla mianie sapraŭdnym vyprabavańniem. Ja kinuła sabie vyklik, ale nie dumała što budzie nastolki składana».
Andrea pryjechała ŭ Biełaruś bieź vizy. Dla hramadzian Brazilii, jakija pryjazdžajuć da nas dla tranzitu, turyzmu abo pa pracy, nie treba vizy na termin da 90 dzion. Adzinaja ŭmova — hość abaviazany zarehistravacca na praciahu piaci sutak u padraździaleńni Departamienta pa hramadzianstvie i mihracyi. Z hetym i paŭstali prablemy ŭ padarožnicy.
«Kudy chaču, na kolki chaču i kali chaču»
Andrea padarožničaje ŭžo try hady i naviedała bolš za 30 krain na roznych kantynientach. Była ŭ Amierycy, Azii i Jeŭropie.
«Ja ŭžo nie mahu siabie prymusić nie padarožničać, — kaža Andrea. — Kali viartajusia dadomu, ja znoŭ adčuvaju, što chaču ŭ darohu. Ja sumuju doma pa padarožžy. Ludzi časam kažuć, što ja varjatka, tamu što ŭ mianie niama dakładnaha płana — kolki dzion pavinna doŭžycca padarožža ci kolki kiłamietraŭ pavinna prajechać. U mianie jość prosta napramak, u jakim ja chaču ruchacca. I ja nie chaču abmiažoŭvacca niejkimi ramkami, tak što jedu kudy chaču, na kolki chaču i kali chaču».
Andrea padčas padarožža. Žančynie 51 hod i jana na piensii. Padarožničaje za košt piensii i za košt taho, što ŭ Brazilii zdaje svaju kvateru.
Nie turbujusia i prosta kruču piedali
U śniežni Andrea płanuje viarnucca ŭ Braziliju, ale nie viedaje, kolki jašče kiłamietraŭ prajedzie da taho času. U płanach u Andrea zastacca ŭ Biełarusi na miesiac, kali ŭsio atrymajecca z rehistracyjaj, a paśla naviedać Litvu, Łatviju i Estoniju. Dalej žančyna pajedzie albo ŭ Anhliju, albo Rasiju, a kančatkovaj kropkaj padarožža stanie horad Tromsie ŭ Narviehii, dzie padarožnica choča ŭbačyć paŭnočnaje źziańnie.
«U mianie ŭžo jość płany i na nastupny hod. Chaču pajechać u padarožža na try miesiacy pa skandynaŭskich krainach. I znoŭ na svaim rovary. Ale nasamreč ja drenny viełasipiedyst, tamu što ja ničoha nie razumieju ŭ rovarach. Adzinaje, što ja mahu papravić, dyk heta zalapić kamieru. Ja nie turbujusia i prosta kruču piedali. Kali niešta złamajecca — budu šukać dapamohu».
Padarožnica z Brazilii ŭ Hrodnie na vulicy Karła Marksa.
Jak stała viadoma Hrodna. life, Andrea ŭsio ž zarehistravałasia ŭ mihracyjnaj słužbie ŭ Hrodnie, ale tolki paśla dapamohi žurnalistaŭ TUT.BY. Ciapier žančyna moža znachodzicca ŭ Biełarusi da 90 dzion
