Udava łaŭreata Nobieleŭskaj premii miru, kitajskaha pravaabaroncy Lu Siaabo zmahła pakinuć krainu paśla bolš čym siami hadoŭ chatniaha aryštu. Pra heta paviedamlaje South China Morning Post.
Pa dadzienych vydańnia, 57-hadovaja Lu Sia nakiroŭvajecca ŭ Hiermaniju. Jana vylecieła ranicaj u aŭtorak na samalocie avijakampanii Finnair. Čakajecca, što paetka spačatku prybudzie ŭ Finlandyju i ŭžo adtul vylecić u Bierlin. Brat žančyny napisaŭ u sacsietkach, što jana źjechała ŭ Jeŭropu, kab «pačać novaje žyćcio». Jon nie pryvioŭ nijakich padrabiaznaściaŭ, ale padziakavaŭ usim za padtrymku.
Paetka znachodziłasia pad chatnim aryštam z 2010 hoda, kali jaje mužu była prysudžana Nobieleŭskaja premija. Kitajskija ŭłady zajaŭlali, što nichto nie ŭtrymlivaje Lu Sia suprać voli. Pa słovach siabroŭ žančyny, paśla mnohich hadoŭ abmiežavańnia voli ŭ jaje raźviłasia depresija, i jana nie moža zasypać bieź lekaŭ.
