Lidery KCHP-BNF i PBNF adnolkava pakazali siabie niepryhoža, nia zdoleŭšy damovicca pra adzinaje šeście. Piša Barys Tumar.
A vy kryžoŭ nie vyrablajecie... A vy śviadoma zamykajeciesia... A my 10 hadoŭ chodzim ad Parku Čaluskincaŭ... A sioleta 20‑hodździe 1988‑ha, tamu jość sens pajści ad Uschodnich mohiłak... Treba rabić tak, jak zaŭždy... Treba stvarać umovy dla dałučeńnia novych ludziej... Tak spračalisia frontaŭskija mudracy. A vynik prykry — dva šeści asobna. «Heta niepaźbiežna, peryjad ciapier taki — raskidvańnia kamianioŭ», — kaža analityk.
Chto bolš vinavaty u tym, što kalony nie złučylisia, jak taho chacieła, upeŭnieny, bolšaść manifestantaŭ? Lidery Partyi BNF, jakija nie zaplanavali ŭšanavańnia na Ŭschodnich na paŭhadziny raniej? Lidery KCHP‑BNF, što pašybavali napierad, nia majučy namieru pačakać? Tyja i tyja ŭpiorlisia roham. Adny ličać siabie adzinymi čystymi, druhija nia ścierpiać...
Tak, u palitycy kankurencyja niepaźbiežnaja i patrebnaja dla naturalnaha adboru. Ale kožnaja kankurencyja musić mieć svaje praviły i, asabliva, mety. Dobry palityk toj, chto vałodaje taksama mastactvam kampramisu, mastactvam sastupać.
Što Paźniak i Barščeŭski ŭpartyja ŭ svaich pierakanańniach, usim viadoma. I što majuć 20‑hadovy palityčny dośvied, taksama. I jak jany padzialili Front, historyja viedaje. Adnak dzialić Dziady, pryčym u suvory čas — mudryja palityki zmahli b hetaha paźbiehnuć. Kali ty lider nacyjanalnaha maštabu, kali ty napraŭdzie chočaš uznačalić cełuju krainu, takuju raznarodnuju, ty musiš znachodzić šlachi nia tolki napierad, ale i nazad.
Palityčnyja muskuły pakazvać i palityčny nerv praviarać treba ŭ inšy čas i inšym miescy.
Padzieł šeścia na Dziady znoŭ pakazaŭ, nakolki niezaležnaje hramadztva začakałasia źmieny pakaleńniaŭ — instytucyjnaje i persanalnaje. Darečy, pazycyja Sieviarynca, jaki demanstratyŭna prajšoŭ paŭdarohi z adnym i druhim šeściami, vyklikaje pavahu.
