Piotr Aficeraŭ. Fota Jaŭhienija Fieldmana, «Novaja hazieta» (Vikimiedyja)
Pra śmierć Piatra Aficerava pieršaj paviedamiła ŭ tvitary žurnalistka Jaŭhienija Albac, piša Bi-Bi-Si. «Piecia Aficeraŭ… Dzivosny, vydatny, šanoŭny čałaviek, zaŭsiody hatovy dapamahčy, niejkaj vyklučnaj unutranaj stojkaści, mužnaści, pierakananaści. Jak ža śviet źbiadnieŭ bieź Pieci Aficerava», — napisała Albac.
Paźniej infarmacyju pra śmierć Aficerava paćvierdziła jaho advakatka Śviatłana Davydava. Pryčyna śmierci pakul nieviadomaja. Na pačatku tydnia paviedamlałasia, što biznesoŭcu špitalizavali z čerapna-mazhavoj traŭmaj.
Sprava «Kiraŭlesa»
Sprava, pa jakoj prachodziŭ Aficeraŭ, tyčyłasia abvinavačvańnia Alaksieja Navalnaha, jaki zajmaŭ u 2008-2009 hadach pasadu daradcy tahačasnaha hubiernatara Kiraŭskaj vobłaści Mikity Biełych, u kradziažy majomaści Kiraŭskaha dziaržaŭnaha pradpryjemstva «Kiraŭles».
Pa viersii śledstva, Navalny schiliŭ dyrektara pradpryjemstva da zaklučeńnia niavyhadnaha kantraktu na karyść «Viackaj lasnoj kampanii», jakoj kiravaŭ Piotr Aficeraŭ. I Navalny, i Aficeraŭ nikoli nie pryznavali vinu.
18 lipienia 2013 hoda Navalnaha, jaki dniom raniej atrymaŭ status zarehistravanaha kandydata na vybarach mera Maskvy, prysudzili da piaci hadoŭ kałonii, Aficerava — da čatyroch hadoŭ. Abodva byli ŭziatyja pad vartu ŭ zale suda.
Adnak užo na nastupny dzień toj ža sud niečakana pryniaŭ rašeńnie admianić aryšt Navalnaha i Aficerava i vypuścić ich na volu pad padpisku ab niavyjeździe. Paśla razhladu apielacyi abłasny sud zamianiŭ Aficeravu i Navalnamu termin na ŭmoŭny.
