«Radyjo Svaboda» apublikavała repartaž z aŭtapierachodu Zavolša — Rudnia na biełaruska-rasiejskaj miažy, dzie ad 1 žniŭnia mielisia zabaranić prajezd inšaziemcaŭ.

Pavodle źviestak rasiejskaha lahistyčnaha sajtu logirus.ru, urad Rasiei z 1 žniŭnia źbiraŭsia spynić propusk hramadzian trecich krain praź biełaruska-rasiejskuju miažu.

Karespandent Svabody nakiravaŭsia na aŭtapierachod Zavolša-Rudnia, kab spraŭdzić, jak ciapier traplajuć u Rasieju inšaziemnyja aŭtamabili.

Aŭtapierachod Zavolša — Rudnia — na miažy Viciebščyny i Smalenščyny. Jon pryznačany dla ruchu lehkavoha i hruzavoha transpartu pa tak zvanym «Kalininhradzkim kalidory» — šlachu z Kalininhradu ŭ Maskvu cieraź Litvu. Mašyny ź litoŭskimi i łatvijskimi numarami tut jeduć časta. Dzień 1 žniŭnia nia staŭ vyklučeńniem: pra siońniašniuju nibyta zabaronu na ŭjezd u Rasieju kiroŭca litoŭskaj kampanii Girteka navat nia čuŭ.

Jon dadaje, što kampanija Girteka achvotna prymaje na pracu biełarusaŭ. Nie ŭ apošniuju čarhu dziela taho, kab paźbiehnuć prablem z prachodžańniem biełaruska-rasiejskaj miažy ŭ vypadkach zabarony na ŭjezd dla hramadzian Eŭraźviazu.

Na biełaruska-rasiejskich aŭtapierachodach niama pamiežnikaŭ, bo aficyjna niama miždziaržaŭnaj miažy. Ale čas ad času pryjaždžajuć tak zvanyja «latučyja bryhady» pamiežnikaŭ, jakija spraŭdžvajuć pašparty i mohuć «zaviarnuć» inšaziemca.

Takoje zdarałasia i raniej — jašče da abvieščanaj daty 1 žniŭnia, kaža kiroŭca-biełarus Andrej:

«Pazaŭčora tut na maich vačach «zaviarnuli» hramadzianina Ŭkrainy na lehkaviku ź litoŭskimi numarami. Takoje čas ad času zdarajecca, bo farmalna ŭsio słušna: praz dvuchbakovyja pierachody majuć prava prajaždžać tolki biełarusy dy rasiejcy. Ad «strachaŭščykoŭ» ja čuŭ, što ad siońnia sapraŭdy chacieli spyniać zamiežnikaŭ, ale zabarona dziejničała tolki dźvie hadziny. Potym pryjšoŭ faks, i jaje admianili».

Pakolki na pamiežžy, aprača strachaŭščykoŭ i mytnikaŭ, niama inšych struktur, to daznacca pra padrabiaznaści bolš niama ŭ kaho.

Vital, rabotnik biełaruskaj strachavoj kampanii, pra mahčymuju zabaronu ŭjezdu na terytoryju RF dla inšaziemcaŭ čuŭ. Jon bačyŭ, što napiaredadni rasiejcy sapraŭdy niekalki razoŭ spyniali i «zavaročvali» hramadzianaŭ Polščy i Litvy.

Za perypetyjami na darozie nazirajuć i rabotniki prymiežnaj kaviarni. Siudy zachodziać i kiroŭcy, i pasažyry, i strachaŭščyki — jak ź biełaruskaha, tak i z rasiejskaha boku.

Taciana pracuje tut z 2010 hodu i kaža, što heta nia pieršaje «abvastreńnie na miažy»:

«U nas na miažy «abvastreńni», jak tolki va ŭradzie ŭ kahości kiepski nastroj. To ŭ našym, to ŭ ichnym. Paradku nia budzie, pakul nia prymuć narmalnyja zakony. A nia tak, što «chočam — puścim, nia chočam — nia puścim». Kolki razoŭ my takoje ŭžo nazirali!»

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?