Kaniec červienia, Baranavičy. U vajskovuju kamiendaturu viazuć staršynu roty 8-j bryhady vajskovaj čaści 29969 (supraćpavietranyja vojski).
U «vaśmiorcy» mužčyna słužyć zusim niadaŭna, paru miesiacaŭ.
Heta były śpiecnazaviec z Marjinaj Horki, i chacia ŭ Baranavičach jon raskazvaŭ, što pieraviali jaho pa stanie zdaroŭja, heta niapraŭda — raźvitacca z SSA jamu daviałosia praz kliničnuju ahresiju — niekalki razoŭ jon byŭ zamiešany ŭ bojkach.
Apošniaj kroplaj dla kiraŭnictva 5-j bryhady stała toje, što jon złamaŭ nahu niejkamu čałavieku na vulicy. Za heta jaho adpravili słužyć u baranavickuju čaść «dla zalotnych» — takaja reputacyja ŭ «vaśmiorki» (chacia takoha piersanaža spraviadliva było b uvohule vyhnać).
I voś znoŭ staryja pamyłki — napadpitku, jak kažuć, staršyna źbivaje dvuch sałdat u Baranavičach, — i heta paśla «koržyčaŭskich» raznosaŭ u vojsku!
U novaj čaści jamu heta nie darujecca i, užo jedučy, zatrymanym, u mašynie kamiendatury, jahony napałochany mozh znachodzić vyratavańnie — vypadkova zatrymany vypadkova apraŭdvajecca «A čamu vy ŭvohule na mnie adryvajeciesia? U vas tut u čaści i bieź mianie dupa». I hetym daje start kaśmičnaj pa svaim absurdzie kryminalnaj spravie.
* * *
Na ranicu nastupnaha dnia žychary rajona «Vajenny haradok» ad samaj ranicy bačać dziŭnuju karcinu — ceły šmatkvaterny dom atočany mašynami sapioraŭ, milicyi, kamiendatury i chutkaj damapohi.
Nichto nie razumieje, što adbyvajecca.
A adbyvajecca voś što — pieratrus u 24-hadovaha praparščyka «vaśmiorki» Dźmitryja K., jaki słužyć u rocie materyjalna-techničnaha zabieśpiačeńnia na pasadzie zahadčyka zbrojnaha składu čaści.
Rankam da jaho z nadumanaj pryčyny paprasilisia ŭ hości načalnik čaści ź jašče adnym sasłužyŭcam — nasamreč kamandzir chacieŭ spraŭdzić paviedamleńnie zatrymanaha napiaredadni śpiecnazaŭca pra toje, što ŭ Dźmitryja K. doma arsienał zbroi: pistalety i aŭtamaty.
I kamandzir znachodzić u kvatery zbroju! — niekalki pistaletaŭ Makarava, niekalki AKSU.
Dźmitryja K. skručvajuć, pryjazdžajuć nadzvyčajnyja słužby.
Padazravany ŭ kradziažy zbroi praparščyk Dźmitryj K., fota z zastaŭki mesendžara.
Ciaham dopytaŭ vyśviatlajucca šakujučyja detali.
Akazvajecca, prykładna z vosieni minułaha hoda (śledstva jašče ŭstanović dakładnyja daty) praparščyk K. mietadyčna vynosiŭ sa składa, za jaki adkazvaŭ, zbroju.
Nijakaj invientaryzacyi za hety čas nie pravodziłasia, navat pry tym, što źmianiŭsia kamandzir, — a heta abaviazkova pracedura paśla źmieny kamandavańnia.
Havorka, jak viadoma «Našaj Nivie», idzie pra čatyry dziasiatki adzinak zbroi — aŭtamaty i pistalety, hranaty i patrony — asobna.
Rabiłasia heta «niejmavierna toparna», jak kažuć znajomyja sa spravaj, — jon prosta kłaŭ u zaplečnik aŭtamat i prachodziŭ praz KPP, bo jaho nichto nie praviaraŭ.
Varta dadać, što sam toj skład znachodzicca na terytoryi 61-j avijabazy, zvyšvažnaha abjekta biełaruskaj armii.
Aŭtamat Kałašnikava składny ŭkaročany (AKSU)— taki možna pranieści ŭ zaplečniku, bo jon składvajecca i nievialikaha pamieru.
Ci dadumaŭsia praparščyk da hetaha sam? Možna mierkavać, što nie — u chodzie śledstva jon daŭ pakazańni na jašče dvuch čałaviek: druhoha praparščyka, starejšaha pa hadach (u minułym — čornaha kapača, jakomu vynosilisia papiaredžańni za pryciahnutyja ź lesu PPŠ) i… vysokapastaŭlenaha supracoŭnika Baranavickaha rajadździeła ŭnutranych spraŭ.
Hetaja trojca ŭ dadzieny momant zatrymanaja, rola kožnaha vyśviatlajecca, ale asnoŭnym staić pytańnie losu zbroi — pa našaj infarmacyi, častku pakul nie znajšli.
Što ź joj rabili? Heta asobnaja historyja.
Praparščyk K. chvaliŭsia dostupam da zbroi pierad svaimi siabroŭkami i navat stralaŭ pierad imi z PMa i aŭtamata Kałašnikava. Niekalki hranat jon uzarvaŭ… Niekalki adzinak zbroi jon razdaryŭ svaim znajomym, u jakich nie ŭźnikła pytańniaŭ adnosna zakonnaści takich padarunkaŭ — čamu jany pra heta nie padumali, hetyja ludzi ciapier raskazvajuć śledčym z kontrraźviedki.
Ale što taja raźviedka! Jak nam viadoma, pistalet u padarunak atrymaŭ navat i supracoŭnik kontrraźviedki — praŭda, nie aficer, a taki ž kantraktnik-kiroŭca, jaki siabravaŭ z K.
Ale i hety chaj sabie «raźviedčyk» tolki pa miescy raboty, a nie pa prafiesii, nie paličyŭ patrebnym raskazać ludziam, jakich jon vozić, pra takija padarunki. Hety kiroŭca zatrymany.
Taksama niekalki adzinak zbroi trapili na ruki da tutejšych ludziej — kažuć, adzin dzied kupiŭ aŭtamat, pistalety prapanoŭvalisia taksistam i prynamsi adzin takoj prapanovaj skarystaŭsia.
Jak śćviardžajuć krynicy «Našaj Nivy», AKSU pradavaŭsia za 1000 dołaraŭ, PM — za 250.
Viadoma, što ŭsie tyja, chto kupiŭ ci atrymaŭ u padarunak zbroju, ciapier znachodziacca pad śledstvam, jašče častku skradzienaha śledčyja znajšli ŭ dźviuch schovankach pad Kleckam i Baranavičami.
Nakolki možna mierkavać pa infarmacyi ad krynic, niaznojdzienuju častku zbroi starejšyja «siabry» K. pradali ŭ Rasiju i mielisia pradać jašče, kali b nie pjanyja pryhody asobna ŭziataha staršyny.
Jak nam viadoma, ciaham śledstva K. kazaŭ, što chacieŭ «pradać zbroju i zhubicca ŭ Rasii».
Jak stała viadoma «Našaj Nivie», rasśledavańnie hetaj historyi viadziecca ŭ atmaśfiery tajemnaści i sakretnaści — ministr Raŭkoŭ pryjazdžaŭ u Baranavičy i hadzinu kryčaŭ, što «vaśmiorku» treba raspuścić, spravu viaduć najlepšyja śledčyja aparataŭ kontrraźviedki i KDB.
Hetaja historyja stavić pad pytańnie i budučyniu asobnych ministraŭ, i stan usioj sistemy biaśpieki. Vyklučny vypadak byŭ raskryty nie sistemnaj rabotaj śpiecsłužbaŭ, a vypadkova. A śpiecsłužby nie viedali pra toje, pra što viedali rajonnyja kampanii, pierad jakimi K. chvaliŭsia zbrojaj.
Jak kažuć ludzi, jakija adsłužyli ŭ «vaśmiorcy» nie adzin dziasiatak hod i ciapier na piensii — padobnaj situacyi tam raniej nie zdarałasia. Chto słužyŭ, toj viedaje, što ŭ armii, byvaje, za adnu hilzu sadziać, a tut amal što hod ciahali zbroju z bajavoha składa.
Ministerstva abarony paćvierdziła fakt nadzvyčajnaha zdareńnia ŭ adnoj z baranavickich čaściej.
