pixabay.com
Nievialiki šachciorski haradok Brokien-Chił u aŭstralijskim štacie Novy Paŭdniovy Uels litaralna pazapaŭniali strausy emu, jakija siudy pryjšli ŭ pošukach vady i ježy, piša Bi-bi-si.
«Jany hulajuć pa hałoŭnaj vulicy horada, ich tut cełyja natoŭpy», — kaža pradstaŭnica słužby pa vyratavańni dzikich žyvioł Ema Sinhłtan.
Pryčynaj takoha našeścia śpiecyjalisty nazyvajuć niezvyčajnuju zasuchu, ad jakoj pakutujuć nie tolki žyvioły, ale i ludzi.
Novy Paŭdniovy Uels, samy hustanasieleny štat Aŭstralii, vyrablaje čverć usioj sielskahaspadarčaj pradukcyi krainy.
8 žniŭnia na ŭsioj terytoryi štata była aficyjna abvieščana zasucha, a premjer-ministr Malkalm Ternbuł paabiacaŭ paciarpiełym fiermieram materyjalnuju dapamohu 1,3 miljarda dalaraŭ ZŠA.
Miž tym, pa paviedamleńniach aŭstralijskaj teleradyjoviaščalnaj kampanii Ej-bi-si, u Brokien-Chile, u 935 km na zachad ad Sidneja, emu ładziać honki pa hałoŭnaj vulicy horada, robiać naloty na sady i navat uryvajucca na futbolnyja pali padčas matčaŭ.
«Na stadyjonie voś užo niekalki tydniaŭ žyvuć 14 strausaŭ, i miascovyja žychary prynosiać im vadu i korm», — raspaviadaje Ema Sinhłtan.
U intervju Ej-bi-si jana padkreśliła, što da ich u arhanizacyju štodnia pastupajuć zvanki ad hramadzian, zakłapočanych losam ptušak.
