Rasijskaje vydańnie Lenta.ru pasprabavała razabracca, navošta Łukašenku spatrebilisia terminovyja pierastanoŭki va ŭradzie, i jak jany adabjucca na stanie biełaruskaj ekanomiki.
Vydańnie piša, što rasijskaja aŭdytoryja ŭsprymaje publičny raznos ministraŭ Łukašenkam jak niejkaje ekzatyčnaje vidovišča. Pry hetym dla biełaruskich realij takoje ŭžo daŭno stała rucinaj.
Łukašenka nibyta pierakanany, što represii ŭ dačynieńni ministraŭ i čynoŭnikaŭ padymajuć jaho rejtynhi i spryjajuć rostu papularnaści siarod nasielnictva. Adnak hetym, mabyć, pazityŭny efiekt ad ich i vyčerpvajecca, piša Lenta.ru.
Vydańnie piša, što novy premjer Siarhiej Rumas, jakoha ličać libierałam i zachodnikam, nie taki ŭžo i novy — da 2012 hoda jon zajmaŭ pasadu namieśnika tahačasnaha kiraŭnika ŭrada Michaiła Miaśnikoviča. Urada, jaki za ŭvieś čas svajoj pracy nie prademanstravaŭ nijakich asablivych pośpiechaŭ.
Niejkich reformaŭ ad urada Rumasa nie budzie, miarkuje Lenta.ru. Pa-pieršaje, Łukašenka krytykavaŭ Rumasa za rynkavyja idei, kali toj byŭ va ŭradzie Miaśnikoviča. Łukašenka zaŭsiody kateharyčna adkidaŭ mahčymaść praviadzieńnia ŭ Biełarusi surjoznych libieralnych pieraŭtvareńniaŭ, patrabujučy ad profilnych ministerstvaŭ tolki palapšeńniaŭ dziejučaj sistemy.
«Tak ci inakš, dla Łukašenki asnoŭnym faktaram pry vybary kandydatury na tuju ci inšuju dziaržaŭnuju pasadu źjaŭlajecca nie stolki kampietentnaść i prafiesijanalizm, kolki dyscyplina, łajalnaść i kiravalnaść, i Rumas padychodzić pad hetyja paramietry amal idealna»,
— piša Lenta.ru.
Tym nie mienš takomu premjeru sapraŭdy buduć rady na Zachadzie, miarkuje rasijskaje vydańnie. Chutčej za ŭsio, Łukašenka, robiačy kiraŭnikom urada ŭmoŭnaha libierała, raźličvaje na prasoŭvańnie ŭ pytańniach zamiežnych inviestycyj i kredytaŭ MVF.
Lenta.ru źviartaje ŭvahu na jašče adno pryznačeńnie — vice-premjeram, jaki kuryruje sacyjalnuju śfieru, kulturu, sport i achova zdaroŭja, staŭ ciapierašni pasoł Biełarusi ŭ Rasii Ihar Pietryšenka. Vydańnie miarkuje, što takoje pryznačeńnie ŭzmacniaje pazicyi Uładzimira Makieja va ŭradzie.
Uładzimir Makiej. Fota: MZS Biełarusi.
Tym nie mienš raznosy, hučnyja adstaŭki i novyja pryznačeńni naŭrad ci zmohuć nablizić biełaruskuju ŭładu da vyrašeńnia asnoŭnaj prablemy — vychadu z ekanamičnaha tupika. U Biełarusi zapavolvajecca rost VUP, buksuje pramysłovaść. I, što samaje hałoŭnaje, Rasija bolš nie pakazvaje adnaznačnaj hatoŭnaści padtrymlivać svajho chaŭruśnika:
— Mienavita hety momant — zdolnaść damovicca z Rasijaj — i stanie klučavym dla dalejšaha raźvićcia biełaruskaj ekanomiki, jakoj dla narmalnaha funkcyjanavańnia brakuje adnoj drobiazi — hrošaj. I, jak pakazvaje praktyka, pryjści jany mohuć tolki z Maskvy, a nie z Brusiela, Vašynhtona ci Piekina. Jak na heta moža paŭpłyvać «zachodni viektar» va ŭradzie, pakul nie jasna,
— piša Lenta.ru.
Vydańnie adznačaje, što stanovišča prostych biełarusaŭ pryznačeńnie novaha premjera naŭrad ci palepšyć. Rumas sutykniecca z adviečnymi zahanami biełaruskaj ekanomiki — nizkaj kankurentazdolnaściu, zaležnaściu pradpryjemstvaŭ ad padtrymki dziaržavy i zaležnaściu samoj dziaržavy ad źniešnich finansavych ulivańniaŭ, pra jakija pryjdziecca damaŭlacca z Rasijaj. Ale na hety raz dekłaratyŭnaj łajalnaści budzie niedastatkova, piša Lenta.ru.
