Ivan Šyła dva hady pracavaŭ na telekanale «Biełsat» SMMščykam. Adkazvaŭ za kantent u sacyjalnych sietkach.
Ivan Šyła. Fota z facebook.com.
19 vieraśnia na svajoj ułasnaj staroncy ŭ fejsbuku Šyła źmiaściŭ zdymak pres-słužby prezidenta ZŠA. Na im Donald Tramp i prezident Polščy Andžej Duda padčas padpisańnia dekłaracyi ab umacavańni stratehičnaha partniorstva miž krainami. Na zdymku Tramp siadzić urazvałačku ŭ kreśle, a Duda stojačy stavić svoj podpis.
«Źleva — prezident Polščy», — napisaŭ Šyła. Nijakich acenak pieršapačatkova hetamu zdymku zroblena nie było. U vyniku ŭ kamientary da Ivana pryjšło kiraŭnictva telekanała «Biełsat».
Namieśnica dyrektara «Biełsata» Bieata Krasickaja napisała: «Ty maješ razumieńnie, dzie ty pracuješ? Ci nie da kanca?» «Ja mahu pościć aficyjnaje fota z sustrečy polskaha palityka i amierykanskaha prezidenta. Kali nie, to ja, mahčyma, niečaha nie razumieju pra svabodu ŚMI», — adkazaŭ Ivan.
«Cenzura? Tady jedź u Biełaruś i ciešsia tam svabodaj słova», — adreahavała Krasickaja.
«Cenzura… Bła-bła-bła… Zrabiŭ hłupstva — treba pabałbatać pra cenzuru… U ciabie prablema z razumieńniem nie tolki taho, što takoje łajalnaść da pracadaŭcy, ale i łajalnaść da kaleh i ŭsich hetych ludziej, jakija vializnymi namahańniami sprabujuć dapamahać tvajoj krainie i tvaim suajčyńnikam. A ŭ pryvatnaści i da mianie. I ty pavinien pra heta surjozna padumać. Damova pra vajskovuju supracu z ZŠA maje vielizarnaje značeńnie dla biaśpieki Polščy, i heta adna ź niešmatlikich temaŭ, jakija nie źjaŭlajucca hlebaj dla žartaŭ supracoŭnikaŭ «Biełsata». Zrazumieŭ?» — adreahavała dyrektarka telekanała Ahnieška Ramašeŭskaja.
Na nastupny dzień Ivana biez papiaredžańnia vydalili z redakcyjnych čataŭ, a taksama pazbavili prava administravać supołki telekanała ŭ sacyjalnych sietkach.
Tolki praź niejki čas jon daviedaŭsia pra svajo zvalnieńnie z telekanała. Pryjšoŭ list za podpisam namieśnika dyrektara «Biełsata» Alaksieja Dzikavickaha: «Dyrekcyjaj našaha telekanała pryniataje rašeńnie ab tvaim zvalnieńni. Padstava — nieadpaviednyja pavodziny ŭ dačynieńni da kalehaŭ i ŭsioj firmy».
«U kožnaha ŚMI jość svaja redakcyjnaja palityka. U «Biełsata» jana takaja: «Nielha supracoŭnikam upisvacca ŭ kramloŭski prapahandyscki naratyŭ, u pryvatnaści, nakiravany suprać Polščy, navat kali jany ličać heta vielmi śmiešnym». Nie razumieju, što tut dla kaho dziŭnaha? I što symnieŭnaha», — napisała Ramašeŭskaja.
Varta adznačyć, što maci Ahnieški Ramašeŭskaj — daradca prezidenta Andžeja Dudy.
Sam Ivan Šyła hetak kamientuje zvalnieńnie: «Mianie zvolnili za publičny kanflikt z kiraŭnictvam. Za heta zvalniajuć paŭsiul. Nie ja jaho inicyjavaŭ, ale ja adkazvaŭ kiraŭnictvu kanała. Nie prajšło 19 hadzinaŭ z momantu publikacyi, jak mianie zvolnili. Tak, ja liču heta cenzuraj», — kaža Šyła.
«Maja reakcyja narmalnaja, ja na mory, u Francyi, u mianie adpačynak, idu na prabiežku, — kaža Šyła. — U mianie jość biznes [klininhavaja kampanija «Čysty kit»] i pryjšoŭ čas na im zasiarodzicca. Kab spakojna pisać u fejsbuku pra toje, dzie znachodziacca prezidenty Polščy i Biełarusi».
