Pačaŭsia čarhovy sud nad adnavajskoŭcami Alaksandra Koržyča — sałdata, jakoha znajšli hod tamu paviešanym u Piečach. U sudzie Minskaha rajona pačaŭsia praces nad staršym lejtenantam Paŭłam Sukavienkam i praparščykam Arturam Virbałam. Ich vinavaciać u złoŭžyvańni ŭładaj, a heta da 10 hadoŭ pazbaŭleńnia voli. Starlej Sukavienka byŭ kamandziram roty, u jakoj słužyŭ Koržyč. Praparščyk Virbał byŭ staršynoj. Jak i ŭ vypadku z «dziadami» z vajskovaj častki, śledstva vyrašyła, što niama padstaŭ razhladać pavodziny Virbały i Sukavienki jak daviadzieńnie da samahubstva.
Artur Virbał
Zatrymali Paŭła Sukavienku i Artura Virbału jašče ŭ kastryčniku 2017 hoda. Sukavienku nieŭzabavie zvolnili z vojska.
Pavieł Sukavienka
U Virbały znajšli bankaŭskuju kartku sałdata Alaksandra Koržyča. Praparščyk tłumačyŭ, što nibyta pazyčaŭ hrošy ŭ sałdata.
Cikava, što na pracesie prysutničajuć siaržanty Baranoŭski, Viaževič i Skuratovič, jakich taksama sudziać pa spravie Koržyča. Tolki na hetym pracesie jany prachodziać jak paciarpiełyja.
Ahułam paciarpiełych ad dziejańniaŭ Virbały i Sukavienki — siamiora vajskoŭcaŭ.
U pačatku pasiadžeńnia prakuror ahučyŭ abvinavačvańnie. Artur Virbał prymušaŭ kursantaŭ adciskacca, takim čynam karaŭ tych za biesparadak. Za parušeńni dyscypliny i karystańnie mabilnikami praparščyk biŭ siaržantaŭ i sałdat: pałkaj pa dupie, nahoj pa nazie, rukoj pa plačy, pałkaj pa śpinie…
Pra bankaŭskuju kartku Koržyča prakuror nie ŭzhadvaŭ.
Starleja Paŭła Sukavienku vinavaciać u tym, što jon, kali vydavaŭ hrošy sałdatam, trochi pakidaŭ sabie. Sumy adnosna nievialikija: 12 rubloŭ, 22 rubli… Ale heta niaredka amal pałova ŭsich hrošaj, što naličvajucca sałdatu za miesiac.
Taksama Sukavienka patrabavaŭ ad padnačalenych nabyvać jamu pradukty. Siaržant Baranoŭski nabyŭ nie mienš za 100 pakunačkaŭ raspuščalnaj kavy dla Sukavienki. Inšyja nabyvali dla kamandzira tuju ž kavu «3 u 1», sasiski ŭ cieście, piečyva, cyharety… Samo saboj, hrošy za heta Sukavienka nie addavaŭ.
Ahułam materyjalnych kaštoŭnaściaŭ Sukavienku addali na sumu, nie mienšuju za 245 rubloŭ. Akramia taho, jon taksama prymušaŭ sałdat i siaržantaŭ adciskacca ŭ jakaści pakarańnia, biŭ ich kułakom i pałkaj.
Artur Virbał pryznaŭ vinu całkam. Pavieł Sukavienka pryznaŭ vinu častkova: maŭlaŭ, nahami i pałkaj nikoha nie biŭ. Z astatnimi abvinavačvańniami jon pahadziŭsia.
Zatym sud vyrašyŭ vysłuchać pakazańni paciarpiełych.
«Bolu nie adčuvaŭ. Nu tak, było trochi niepryjemna», — uzhadaŭ udar lejtenanta siaržant Jaŭhien Baranoŭski. Jon koratka paćvierdziŭ: nu tak, prymušali adciskacca, nabyvać kavu. Nu tak, moh atrymać udar kułakom ci pałkaj. Karaciej, jon pieranosiŭ toje, što paśla i sam rabiŭ z sałdatami.
Ale niekatorych udaraŭ, pra jakija kazaŭ prakuror, Baranoŭski nie pamiataje. A adciskańni dyskamfortu ŭ jaho nie vyklikali.
«Nie, mianie heta nie zadavalniała, kaniečnie. Ale i vybaru nie było», — skazaŭ Baranoŭski.
Jon skazaŭ, što stroha karać Sukavienku nie varta. «Pažadana nie pazbaŭlać svabody», — skazaŭ Baranoŭski, jakoha, chutčej za ŭsio, samoha čakaje paru hadoŭ kałonii za dziaduchu. Abvinavačany Artur Virbał paprasiŭ Baranoŭskaha dać jamu charaktarystyku i raskazać, ci biŭ jon biez pryčyny.
«Praparščyk Virbał byŭ samy adkazny ŭ rocie. Svaju pracu vykonvaŭ dobra», — skazaŭ Baranoŭski. Taksama zapeŭniŭ, što biez pryčyny Virbała ŭdary nie nanosiŭ.
Čamu Baranoŭski raspavioŭ pra pavodziny praparščyka, pacikaviŭsia sam Virbała.
«Kali b nie pačałosia heta ŭsio [śmierć Koržyča i raźbiralnictva paśla — red.], ja b nikomu pra heta nie kazaŭ», — adkazaŭ Baranoŭski.
Paśla sudździa spytaŭ Baranoŭskaha, ci nie było dla jaho pryniźlivym toje źbićcio i nabyćcio praduktaŭ.
«Nie liču, što heta było pryniźliva. Nie my stvaryli sistemu, nie nam jaje łamać», — skazaŭ siaržant.
