Jak paviedamili Svabodzie adrazu niekalki krynic, hołas z zapisu vielmi padobny da hołasu namieśnicy dyrektara 31-j himnazii Miensku.
30 kastryčnika Svaboda apublikavała aŭdyjozapis, na jakim čuvać, jak žanočy hołas nastojliva zmušaje vučniaŭ adnoj sa škoł Miensku ŭstupać u šerahi BRSM. Zapis za niekalki hadzinaŭ staŭ virusnym, jaho apublikavali viadučyja medyja.
Jak stała viadoma Svabodzie, zapis byŭ zrobleny vučniami adnaho z klasaŭ 31-j himnazii Miensku. Adrazu niekalki vučniaŭ himnazii paviedamili, što hołas žančyny z zapisu vielmi padobny da hołasu namieśnicy dyrektara 31-j himnazii pa vychavaŭčaj pracy.
«Jaje lohka razzłavać, časam zryvajecca», — paviedamiła Svabodzie adna z vučanic himnazii.
«Heta padobna na jaje. Zapis, chutčej za ŭsio, adbyvaŭsia ŭ minułym hodzie. Bo nastaŭnik, jakoha zhadvajuć u zapisie, bolš u nas nie pracuje. Asablivaha skandału nie było. Prynamsi, nam pra jaho ničoha nie viadoma», — havoryć inšaja vučanica.
Častka surazmoŭcaŭ ź liku vučniaŭ 31-j himnazii ad razmovy kateharyčna admoviłasia, spasłaŭšysia na niežadańnie mieć prablemy z administracyjaj. U himnazii № 31 ad kamentaroŭ taksama admaŭlajucca, źviazacca z zavučam pa vychavaŭčaj pracy pakul niemahčyma. Pavodle infarmacyi ahienctva BiełaPAN, jaje ŭžo vyklikali na razmovu ŭ adździeł adukacyi Mienharvykankamu.
