Urad Rasiei apublikavaŭ siońnia śpis hramadzian Ukrainy, suprać jakich uvodziacca sankcyi. Siarod 322 asobaŭ, pakaranych za «niedružalubnyja dziejańni Ŭkrainy», jość i 35-hadovy biełarus Alaksandar Vasilko, paviedamlaje radyjo «Svaboda».
U dakumencie, jaki padpisaŭ Dźmitryj Miadźviedzieŭ, Vasilko na 38-m miescy. Tam padajecca tolki rasiejskaja i ŭkrainskaja transkrypcyja imia, a taksama data i miesca naradžeńnia — 25 sakavika 1983 hodu, Biełaruskaja SSR.
Chto taki Vasilko i čamu suprać jaho byli ŭviedzienyja sankcyi? Skantaktavacca ź im samim pakul nie ŭdałosia, ale Svaboda daviedałasia, što Alaksandar Vasilko rodam z Baranavičaŭ, skončyŭ Biełaruski dziaržaŭny ahrarny techničny ŭniversytet.
Niekatory čas pracavaŭ dyrektaram pa vytvorčaści na piŭzavodzie «Alivaryja». Paśla pierajezdu va Ŭkrainu Vasilko ŭznačaliŭ bujnuju kampaniju — Carlsberg Ukraine u Lvovie. Mienavita jon inicyjavaŭ vytvorčaść na lvoŭskim brovary piva «Mienskaje Žyhuloŭskaje». U adnym ź interviju jon kazaŭ, što piva vyrablajecca pavodle biełaruskaj technalohii i zhodna ź biełaruskaj recepturaj.
U biznes-katalohu pradpryjemstvaŭ Ukrainy Alaksandar Vasilko paznačany jak dyrektar Dniaproŭskaha kruchmała-patačnaha kambinatu — najbujniejšaha vytvorcy kruchmała-patačnych praduktaŭ va Ŭkrainie. Adnak pradstaŭniki kampanii paviedamili Svabodzie, što Vasilko nie źjaŭlajecca dyrektaram pradpryjemstva ŭžo druhi hod. Samoha Dniaproŭskaha kruchmała-patačnaha kambinatu ŭ sankcyjnym śpisie Rasiei niama.
U asobaŭ, jakija trapili ŭ hety śpis, buduć zablakavanyja na terytoryi Rasiei rachunki, biezdakumentarnyja kaštoŭnyja papiery i majomaść. Taksama jany nia zmohuć vyvodzić kapitał za miežy Rasiei.
