Žycharka Minska Kaciaryna Jukoŭskaja ŭvachodzić u baćkoŭski kamitet himnazii №31. Jaje małodšaja dačka vučycca tut u 5-m kłasie, starejšaja dačka skončyła hetuju ž himnaziju dva hady tamu, piša Radyjo Svaboda.
30 kastryčnika Svaboda apublikavała zapis, na jakim vučniaŭ adnoj z klasaŭ 31-j himnazii nastojliva pierakonvajuć ustupać u BRSM. Hołas, padobny da hołasu namieśnicy dyrektara himnazii pa vychavaŭčaj pracy Inesy Achramovič, nastojliva rekamenduje vučniam uvajści ŭ BRSM, kab nia mieć prablemaŭ pry pastupleńni ŭ VNU.
Sytuacyju vakoł skandalnaha zapisu Svabodzie prakamentavała maci adnoj z vučanic 31-j himnazii, udzielnica baćkoŭskaha kamitetu Kaciaryna Jukoŭskaja.
«Maja starejšaja dačka ciapier vučycca ŭ licei BDU, u 31-j himnazii advučyłasia 9 klasaŭ, — kaža Kaciaryna Jukoŭskaja. — Ustupać u BRSM ich zaprašali. Ale nijakaha hvałtu, ničoha takoha nie było. Ja nasamreč vielmi ździŭlenaja. Mahčyma, heta ŭčynak taki adnaho z baćkoŭ. Mahčyma, niejki kanflikt adbyŭsia — usio moža być. Ničoha drennaha ja nie mahu skazać pra himnaziju. Jany ŭsich zaprašajuć ustupać u BRSM, ja navat nia suprać. Čamu nie? Kali chto choča, to heta žadańnie kožnaha. Ale ŭ našym vypadku nijakich pahrozaŭ i prymusu nie było».
Pa słovach Kaciaryny Jukoŭskaj, jana viedaje ŭ himnazii ŭsich, tam vyrasła adna jaje dačka i raście druhaja. Uražańni ad himnazii tolki stanoŭčyja, i ničoha drennaha jana skazać nia moža. A apublikavany zapis moža być vynikam kanfliktu pamiž supracoŭnicaj himnazii i niekim z baćkoŭ.
«Viadoma, takija metady, jak na zapisie, niedapuščalnyja, — miarkuje Kaciaryna. — Ale vy ž sami razumiejecie — zapisać možna što zaŭhodna. Čałavieka možna davieści. Nastaŭnik — heta składanaja prafesija. Byvajuć zryvy. Ale, viadoma, takija pavodziny niedapuščalnyja. Ja asabista nie znajomaja ź joj (ź Inesaj Achramovič), jana namieśnica dyrektara pa vychavaŭčaj pracy. Nie mahu vam ničoha skazać. Kali heta nasamreč było tak, to ja heta nie ŭchvalaju, viadoma».
U administracyi 31-j mienskaj himnazii sytuacyju z «zahaniańniem u BRSM» nie kamentujuć.
