U hrodzienskaj himnazii № 6 užo šmat hadoŭ staić pomnik — bronzavaja hałava Fieliksa Dziaržynskaha. Jaho nie tolki nie prybirajuć, a naadvarot — ładziać śviatočnyja mierapryjemstvy i ŭskładajuć kvietki.
Fota — grodnonews.by
Niadaŭna pomnik abnavili. Hałavu revalucyjaniera pastavili na vialiki hranitny pastamient.
«Raboty maštabnyja i zakranajuć nie tolki sam bronzavy biust, ale i budynak himnazii. Pa zadumie aŭtaraŭ, fasad, kałony i pomnik stvorać adziny skulpturny kompleks», — pisała pra heta «Hrodzienskaja praŭda».
Dyrektarka himnazii Taćciana Machnač paćvierdziła «Našaj Nivie»: «Praviali hrandyjoznuju masštabnuju rabotu!»
Ale rabiłasia ŭsio nie za košt himnazii ci baćkoŭ, supakoiła dyrektarka, dapamahali sponsary.
Chto sponsar? Kamitet dziaržbiaśpieki, pryznałasia Machnač.
Taćciana Machnač. Fota — grodnonews.by
Ale navošta ŭvohule ŭ himnazii Dziaržynski?
«Dziaržynski tut na praciahu 30 hadoŭ. Budynak himnazii znachodzicca na vulicy Dziaržynskaha, a pomnik musić być prymierkavany da niejkaha sacyjalnaha abjekta. Čamu jaho prybirać, dyj kudy? — adkazvaje dyrektarka. —
Muziej Dziaržynskaha taksama płanujecca. Dakładniej, u nas užo jość školny muziej, prosta tam budzie vialikaja ekspazicyja, pryśviečanaja asobie i dziejnaści Dziaržynskaha. Heta pakul u pierśpiektyvie».
Što budzie ŭ tym muziei? Ci budzie ŭzhadvacca Čyrvony teror? Karnaja palityka SSSR?
«Što budzie tam? Kali budziem adkryvać, to zaprosim haściej. Pryjazdžajcie i pabačycie. Usio, praz što možna vychoŭvać hodnych hramadzian Biełarusi, tam budzie», — adkazała dyrektarka.
Ale jak možna vychoŭvać hodnych hramadzian z dapamohaj Dziaržynskaha? Na hetaje pytańnie spadarynia Machnač adkazvać nie zachacieła.
