12 śniežnia ŭ prastory Lo-Fi Customs partał TuzinFM spravić 15-hodździe svajoj dziejnaści i ŭznaharodzić adkryćcio i najlepšy hurt hetaha hodu. U šort-liście naminacyi «Najlepšy hurt» sioleta šaściora pretendentaŭ.
Pry vyznačeńni naminantaŭ na «Hurt (vykanaŭca) hodu» uličvajecca šerah składnikaŭ, siarod jakich da ŭvahi najpierš biarecca tvorčaja i medyjnaja aktyŭnaść: relizy, hastroli, solnyja kancerty, udzieł u festach, aktyŭnaść u sacsietkach, pośpiech u čartach. Nu, i viadoma, aryhinalnaść i aktualnaść. Naminavacca na «Hierojaŭ» u adroźnieńnie ad «Adkryćcia» možna biaskonca. Najaŭnaść biełaruskaj movy ŭ pieśniach źjaŭlajecca pažadanym, ale nie vyznačalnym kryteram.
Nahadajem raniejšych «Hierojaŭ hodu». U 2004—2005, 2007—2011 hadach uznaharodu atrymlivaŭ pieramožca ŭ vynikovym hałasavańni sezonu za «Najlepšuju pieśniu». Hety byli: «Krambambula» (pieśnia «Lublu», 2004), Zet (pieśnia «Biełakryły anioł», 2005), rok-paet Michał Aniempadystaŭ (2006), N.R.M. (pieśnia «Miensk i Minsk», 2007), «Hluki» (pieśnia «AntiEMO», 2008), «Lapis Trubiacki» (pieśnia «Zorački», 2009), «Hluki» («Kraina 2.0», razam z Mauzer i Green Che, 2010), «Lapis Trubiacki» (pieśnia «Hraj», 2011). Pieršymi status mienavita «Hierojaŭ hodu» atrymaŭ hurt Akute (2012), u 2013-m premiju zasłužyŭ hurt Re1ikt, u 2014 hodzie — Dzieciuki, u 2015-m — «Krambambula», u 2016-m — Siarhiej Doŭhušaŭ i hurt Vuraj, letaś — TonqiXod.
Sioleta ŭ naminantach šaściora pretendentaŭ.
DAJ DAROHU!
Sioleta bieraściejskaja pank-rok kamanda spraviła 20-hodździe. Jubilej adznačyli fantastyčnym kancertam u Prime Hall, pavodle jakoha byŭ źniaty muzyčny film. Stylski z kampanijaj zajhrali vydatnyja sety na šerahu festaŭ, siarod jakich «Rok za Babroŭ», «Naš dzień», Lidski bajk-fest, ukrainski Atlas Weekend. Lider DD! davaŭ i solnyja vystupy, uziaŭ udzieł u kancercie da 100-hodździa BNR, staŭ zaprošanym vakalistam hurta «Krambambula», paŭdzielničaŭ u džazavym navahodnim prajekcie z hurtom Apple Tea i ŭ kancercie pamiaci Alaksandra Kullinkoviča. Hurt taksama prezentavaŭ jaskravyja klipy na novyja pieśni — «Toma» i «Pomohi». Ahułam ža apošnija dva hady muzyki abjeździli z turam «Socpakiet», kudy ŭvajšli najbolš vostryja hity z usich albomaŭ, Biełaruś, Ukrainu, zazirnuli ŭ Polšču i Čechiju. Va Ŭkrainie dyk naohuł DD! adna z samych zapatrabavanych kamandaŭ na festyvalach.
BY CRY
Kamanda na čale z vakalistkaju Alaksandraj Hrachoŭskaj na kožnuju svaju novuju pieśniu zdymaje klip. (Pryčym sama Alaksandra jak praviła vystupaje režyserkaju). Takim čynam za apošnija dva hady pabačyła śviet 12 videa. Najbolš uražvajuć roliki «Viedźminy vočy», «A ty jechaŭ» i «Duša-jalina». Sioleta hurt taksama prezentavaŭ niekalki synhłaŭ («Himn», «Kupała», «Zamova») i daŭ šerah kancertaŭ u Miensku dy ŭ inšych biełaruskich haradach, a taksama pieramoh u konkursie «Kamianiecki drajv-2018».
PIETLA PRISTRASTIJA
Paśla mahutnaha albomu «Moda i obłaka» (2016) hurt vydaŭ usiaho tolki try synhły. Zatoje jakija! Zdavałasia, što paśla pieśni «Hruz» ničoha macniej zapisać nia možna, adnak sioleta źjaviŭsia «Ćvietok» i «Łučšieje zavtra», hity nadzvyčajnyja. A ŭvosień letaś vyjšaŭ jašče «Minotavr». Sioleta hurt daŭ paśpiachovyja kancerty ŭ Miensku, Piecierburhu, Kijevie, Viciebsku, Mahilovie, Maskvie, Varšavie, Ryzie, vystupiŭ na festach «Rok za žyćcio», FSP, «Mahutny fest» u Brasłavie dy staŭ adnym z hedłajneraŭ «Basovišča». Da ŭsiaho pavodle sioletniaha apytańnia Experty.by adrazu dva albomy «Pietli» trapili ŭ top-10 najlepšych biełaruskich dyskaŭ 10-hod́dzia.
ALEŚ JASINSKI
fota Jindrich Oplt
Kampazytar, bajanist, vykanaŭca Aleś Jasinski ŭžo vosiem hod jak žyvie ŭ Čechii, ale suviaź ź Biełaruśsiu dy biełaruskaj muzykaju ŭ jaho tryvałaja. Jon vystupaŭ u jakaści bajanista i suaŭtara piesień u šerahu biełaruskich hurtoŭ, siarod jakich «Hieroi hodu-2016» Vuraj. Zaćvierdziŭ siabie i sam jak aŭtar-vykanaŭca — u 2014-m Aleś uziaŭ Hran-Pry «Bardaŭskaj vosieni». Maje taksama instrumentalny prajekt The Unlimited Trio, a sioleta abjadnaŭsia z českimi muzykami ŭ prajekt «Maresova Yasinski Vasicek». Cioleta taksama Aleś napisaŭ muzyku da spektaklu «Pavietrany źmiej», zapisaŭ sumiesny albom ź Siarhiejem Doŭhušavym «Darohi». Jahonyja prezentacyi adbylisia ŭ Baranavičach, Miensku, Mahilovie, Viciebsku, Bieraści. U Voršy kancert zabaranili, tamu muzyki dali tam kvaternik. Najbolš maštabny aŭtarski prajekt Alesia, jaki byŭ realizavany sioleta — «Kaśmičnaje padarožža», u jakim zadziejničanyja viadomaja polskaja śpiavačka, kultavy švedzki hitaryst, biełaruski multyplikatar, česki aktor i ceły symfaničny arkiestar Praskaj kanservatoryi.
NIZKIZ
Sioleta mahiloŭski hurt źbiraŭ poŭnyja zali praktyčna va ŭsich haradach u miežach svajho biełaruskaha turu, a na kancert u Miensku kvitki na tysiačnuju zalu skončylisia jašče za miesiac da kancertu. Byli i paśpiachovyja solniki inšych biełaruskich haradach, a taksama ŭ Maskvie i Piciery. Kamanda taksama pieramahła ŭ biełaruskim adbory dy vystupiła na bujniejšym ukrainskim feście Atlas Weekend, a taksama stała hościem vialikich biełaruskich open-ejraŭ LidBeer i Viva Braslav. Z relizaŭ — dva šykoŭnyja synhły: «Introviert» i «Lusterka». Nad apošnim muzyki pracavali razam z partuhalskim pradusaram Danielem Kardoza. Na «Lusterka» i na najlepšy hit-2017 na TuzinFM «Niebiaśpiečna» sioleta vyjšli klipy. «Niebiaśpiečna» užo maje bolš za 250 tysiačaŭ prahladaŭ.
PALINA
Cvajo novaje hučańnie dy inšy tvorčy farmat Palina Respublika praanansavała jašče pazaletaś u žyvym secie dla Belsat Music Live. Sioleta śpiavačka źmianiła pseŭdanim — ciapier jana prosta Palina — i prezentavała pieršyja za try hady maŭčańnia pieśni: «Brodskij» na słovy ŭłasna Josifa Brodzkaha i pieršy ŭ žyćci trek pa-anhielsku «Good Girl», zapisany razam z hurtom Nite Nite Nite, tyzer «Rastu» da konkursu «Zaśpiavaj-5». Jana dała kancerty ŭ Miensku, Harodni, Viciebsku, Homielu, vystupiła na bujnych festach «Dikaja miata» u Rasiei i Zaxidfest va Ŭkrainie, u listapadzie ŭ jaje kancerty ŭ Charkavie i Kijevie. Vystup Paliny na kastynhu na ŭkrainskaje telešoŭ «X-faktar» vyklikaŭ furor: avacyi hledačoŭ, adzinahałosnaje ŭchvaleńnie sudździaŭ i bolš za čverć miljona prahladaŭ.
NEURO DUBEL
Pa-za konkursam. Hurt, jaki skončyŭ svoj šlach paśla sychodu ŭ inšy śviet svajho lidera Alaksandra Kullinkoviča. Jany hieroi biełaruskaha roku. Nazaŭždy.
Pieramožca ŭ naminacyi «Najlepšy hurt hodu» (jak i ŭ naminacyi «Adkryćcio hodu») budzie abvieščany na partale TuzinFM.by 1 śniežnia. Mienavita jon vystupić z žyvym setam na 15-hodździ «Tuzina» 12 śniežnia ŭ prastory Lo-Fi Customs (vuł.Kastryčnickaja 16/3, uvachod z boku r.Śvisłač praz čornuju bramku, padjezd z nadpisam «Dvor», druhi pavierch).
NABYĆ KVITOK
Kvitki na viečarynu «Hieroi hodu» užo ŭ prodažy. Da abviaščeńnia pieramožcy kvitki možna nabyć pa 10 rub. Paśla abviaščeńnia ich košt padvysicca da 20 rub., u dzień mierapryjemstva — 25 rub.
