Kala 20 aŭtamabilaŭ taksi źjechałasia ŭviečary 12 listapada na vulicu Kalinoŭskaha pa prośbie adnaho z kiroŭcaŭ, u jakoha paŭstali prablemy z klijentam. Pasažyr taksi admoviŭsia płacić za pajezdku i staŭ abražać kiroŭcu, piša Hrodna.life.
U hrodzienskich taksistaŭ jość śpiecyjalny sihnał na kanale na vypadak kanfliktnych situacyj. Paśla abjaŭleńnia jaho ŭ efiry ŭsie volnyja mašyny źjazdžajucca na dapamohu kalehu. Prykładna ŭ 20:40 na vulicu Kalinoŭskaha źjechałasia kala 20 aŭtamabilaŭ taksi roznych słužbaŭ horada. Jany pryjechali za 10 chvilin.
«Heta salidarnaść nazyvajecca, — raspaviadaje kiroŭca taksi, jaki akazaŭsia ŭ niepryjemnaj situacyi. — Klijenta ja padabraŭ na Urubleŭskaha,
Jon paprasiŭ zavieźci jaho na Kalinoŭskaha. Jon skazaŭ, što možna praz dvary jechać, ja i pajechaŭ. A dalej adbyłasia niepryjemnaja situacyja: jon pačaŭ mianie abražać. Mnie nadakučyła heta słuchać i ja spyniŭsia. Prapanavaŭ jamu vyjści i pry hetym ahučyŭ minimalnuju canu za pajezdku — 3 rubli. Pasažyr vyjšaŭ i nie zapłaciŭ. Paśla hetaha jon pačaŭ kryčać, što jon major i bić u škło. Ja zabłakavaŭ dźviery, paviedamiŭ ab prablemie taksistam i vyklikaŭ milicyju. Hetaha čałavieka treba pravučyć».
Pasažyram taksi akazaŭsia mužčyna siaredniaha ŭzrostu, u minułym vajskoviec. Jon śćviardžaje, što pieršym vyklikaŭ milicyju.
«Ja viedaju, što ja maju racyju, i ruki ŭ hetaj situacyi nie raspuskaŭ, — raspaviadaje pasažyr. — Kiroŭca mianie kudyści pryvioz i skazaŭ vychodzić. Pakul ja vyjšaŭ, jon dźviery zabłakavaŭ. Viadoma, ja pačaŭ kryčać i stukać u škło, kab jon pačakaŭ. A tak ja jaho nie čapaŭ, bo kali b ja ŭdaryŭ — jon by palacieŭ. Navošta mnie čapać kiroŭcu, u mianie jurydyčnaja adukacyja, u minułym u mianie Karabach. Tamu nie mahu kryŭdzić dziaciej. Ja vyklikaŭ milicyju pieršym, a taksisty źjechalisia, tamu što ŭ ich braterstva».
Supracoŭniki DAI i milicyi na razborki pasažyra i taksista pryjechali apošnimi. Udzielniki kanfliktu ad svaich słoŭ nie admaŭlalisia i hatovyja byli abaraniacca. U vyniku pasažyr zapłaciŭ za prajezd, a kiroŭca nastojvaŭ na tym, kab jaho pakarali.
