U subotu, 24 listapada, u Słucku adbudziecca mitynh, pryśviečany 98-j hadavinie Słuckaha zbrojnaha čynu. U raniejšyja hady zbor udzielnikaŭ pačynaŭsia ŭ 14:30, ale ŭ hety raz pačatak mierapryjemstvaŭ byŭ pieraniesieny na 11:00 praz praviadzieńnie ŭ hety dzień futbolnaha matča «Słuck» — «Isłač», jaki musiŭ raspačacca a druhoj hadzinie.
Ale ŭčora na aficyjnym sajcie FK «Słuck» źjaviłasia navina ab pieranosie hulni ŭ Babrujsk z raspłyvistaj farmuloŭkaj «praz mahčymyja niespryjalnyja ŭmovy nadvorja». Heta adrazu vyklikała chvalu abureńnia siarod zaŭziataraŭ — zamiest apošniaj chatniaj hulni jany atrymali vyjazny matč.
Varta adznačyć, što pavodle rašeńnia słuckich uładaŭ u horadzie vyznačanyja tolki dva miescy dla praviadzieńnia masavych mierapryjemstvaŭ: heta haradski park i haradski stadyjon, što mieścicca jakraz u parku.
Udzielniki akcyi majuć sabracca na parkoŭcy stadyjona, paśla čaho kałonaj rušyć u park, dzie projdzie mitynh. Mierapryjemstva musić zaviaršycca ŭ 12:30. Paśla čaho ŭ Domie kultury adbudziecca śviatočny kancert.
Mitynh 2017 hoda. Udzielniki vychodziać z parkoŭki stadyjona. Na fonie vidać administracyjny budynak stadyjona, sprava znachodzicca haradski park.
Ci źviazany pieranos futbolnaj hulni z praviadzieńniem akcyi i mahčymym pierasiačeńniem udzielnikaŭ mitynhu z udzielnikami matča i futbolnymi zaŭziatarami?
U minułyja hady nadvorje nie zaminała praviadzieńniu futbolnych matčaŭ u Słucku ŭ kancy listapada. U 2014 hodzie apošniuju hulniu na «Haradskim» zhulali 23 listapada, u 2015 — 21 listapada, u 2016 — 19 listapada, letaś — 18 listapada.
23.11.14. Hulnia na stadyjonie ŭ Słucku. Užo lažaŭ śnieh, ale heta nie zaminała praviadzieńniu matča. Fota FK «Słuck».
Nijakich kataklizmaŭ hetaj vosieńniu ŭ horadzie nie było, i ŭ bližejšy čas ničoha horšaha za mokry śnieh u Słucku nie čakajecca.
Prahnoz nadvorja ŭ Słucku i Babrujsku z sajta pogoda.by.
Situacyja jak minimum paradaksalnaja. Raniej ułady vykarystoŭvali lubyja nahody dla admieny mierapryjemstvaŭ. Ciapier ža pieranosicca matč, kab nie zaminać akcyi?
U adździele ideałahičnaj raboty Słuckaha rajvykankama nijak nie kamientujuć pieranosu futbolnaj hulni. Futbolny kłub spasyłajecca na ŭmovy nadvorja i niemahčymaść praviadzieńnia matča na naturalnym hazonie — u Babrujsku hulnia projdzie na sintetyčnym poli.
