U sieradu, 28 listapada, litoŭskija pamiežniki ŭ nieprachodnaj dla čałavieka miascovaści znajšli aŭtamabil-amfibiju z 20 karobkami cyharet «Karona super slims» biełaruskaj vytvorčaści, paviedamlaje euroby.info.
Znajści amfibiju atrymałasia dziakujučy tamu, što niedaloka ad miažy ź Biełaruśsiu ŭ Varanskim rajonie Litvy (u Biełarusi heta ŭčastak miažy pamiž nasielenymi punktami Parečča i Raduń u Hrodzienskaj vobłaści) pamiežniki natknulisia na try pustyja lehkavyja mašyny biez kiroŭcaŭ.
Na hetym učastku miažy aharodžy pamiž krainami niama. Sucelnyja bałoty robiać miascovaść nieprachodnaj dla čałavieka, tamu miaža tut tolki paznačanaja ŭmoŭna, tak zvanaja «zialonaja miaža».
U dapamohu pamiežnikam byŭ vyklikany słužbovy viertalot i nieŭzabavie ŭ bałocistaj miascovaści znajšli amfibiju, jakaja dastaŭlała cyharety praz hetyja, zdavałasia b, nieprachodnyja miescy. Miarkujecca, što tavar, niezakonna dastaŭleny ź Biełarusi, źbiralisia pierahruzić u aŭtamabili, jakija dalej raźvieźli b cyharety ŭhłyb Litvy.
Kantrabanda ŭ 12 tysiač pačkaŭ cyharet była acenienaja na 35 tysiač jeŭra. Zatrymanym pa hetaj spravie dvum litoŭcam pahražaje štraf albo navat pazbaŭleńnie voli da 7 hadoŭ i, viadoma, kanfiskacyja amfibii.
