U ścianie kaścioła Maci Božaj Škaplernaj, što ŭ Miadziele, znajšli relikvii, zamuravanyja ŭ 1940 hodzie, pierad prychodam balšavikoŭ. Znachodki vielmi kaštoŭnyja dla Biełarusi, skazaŭ Svabodzie ksiondz Jury Kułaj.
Pra schovanku daviedalisia z natatki adnaho z bratoŭ kaścioła, znojdzienaj u archivie Ordena karmelitaŭ u Krakavie razam z fota staroha Miadzieła. Apisańnia było dastatkova, kab zrazumieć, dzie schavanyja relikvii — pry nahodzie, kali mianiali elektrapravodku, ich znajšli.
Siarod znachodak — parafijalnyja knihi chryščeńniaŭ, šlubaŭ, pamierłych i achviaradaŭcaŭ, niekatoryja jašče z XIX stahodździa, a taksama moščy śviatoj Terezy, śviatoj Cecylii i papy Hryhoryja Vialikaha. Samyja staryja — śviatoj Cecylii, jakaja žyła ŭ Rymie ŭ II stahodździ.
«Ja dumaju, heta sapraŭdy nadzvyčajnaja znachodka, — kaža Svabodzie ajciec Jury. — Relikvii II stahodździa — heta redkaść i dla Biełarusi, i ŭvohule. Raniej u Miadziele byli relikvii śviatoha Justyna, taksama II stahodździa, ale pierad Pieršaj usiaśvietnaj vajnoj unučka fundatara pieraniesła ich u Mosarski kaścioł. Moščy śviatoj Cecylii, jakija znajšli ŭ nas, taksama II stahodździa — a bolš staražytnych relikvij ja nie sustrakaŭ u Biełarusi».
Relikvii zastanucca ŭ kaściole i buduć vystaŭlenyja dla viernikaŭ. Ale kali mienavita heta budzie, pakul nieviadoma: u kaściole jašče pracujuć nad uparadkavańniem znachodak, nabyvajuć admysłovyja relikvaryi.
Z terytoryi Biełarusi vyvozili za miažu šmat relikvijaŭ, kab uratavać ich ad balšavikoŭ, kaža ajciec Jury, ale šmat było prosta źniščana. Aŭtar natatki pra schovanku pisaŭ, što viedaje: iduć savieckija ŭłady, «jakija nie hladziać ni na što».
«I kaścioł sapraŭdy potym byŭ začynieny, vykarystoŭvaŭsia jak skład chimičnych uhnajeńniaŭ, sielskahaspadarčaj techniki, stajaŭ biaz voknaŭ i dźviarej, — raskazvaje ajciec Jury. — Usio było raskładziena-raskidana, śviatary vyjechali ŭ Polšču. Adzin śviatar, jaki zastaŭsia, schavaŭ hetyja rečy, paśla taksama vyjechaŭ u Polšču».
