Spartovy čynoŭnik adkryŭ pryvatnuju firmu pad nazvaj «Respublikanski navukova-praktyčny centar spartovaj i prafesijnaj aryjentacyi». Pa adbitkach palcaŭ jon vyznačaje aptymalnyja dla školnikaŭ vidy sportu. I choć spartovyja medyki nazyvajuć takuju technalohiju paranavukovaj, kampanija supracoŭničaje ź Ministerstvam adukacyi i pravodzić testy ŭ 20 škołach, piša Radyjo Svaboda.
«Daktylaskapija školnikaŭ u pałacie № 6 pry Ministerstvie adukacyi», — napisaŭ u siabie ŭ fejsbuku vykładčyk i dyrektar repetytarskaha centru «100 bałaŭ» Jaŭhien Liviant pra inavacyjny prajekt, raspačaty Respublikanskim navukova-praktyčnym centram spartovaj i prafesijnaj aryjentacyi i Ministerstvam adukacyi.
Školnik zdaje adbitki palcaŭ, i potym prahrama na padstavie skuranych uzoraŭ vyznačaje, jakim vidam sportu jamu lepš zajmacca i jakim maje być jahonaje spartovaje amplua — to bok pazycyja ŭ hulniavych vidach sportu: bramnika, abaroncy ci napadnika.
Leanid Dvarecki, dyrektar «Respublikanskaha navukova-praktyčny centar spartovaj i prafesijnaj aryjentacyi». Fota z sajtu kampanii rcspo-best.by
Inavacyjny prajekt sa škołami raźličany na try hady. Jaho ładziać Ministerstva adukacyi i pryvatnaja kampanija «Respublikanski navukova-praktyčny centar spartovaj i prafesijnaj aryjentacyi», jakim kiruje Leanid Dvarecki. Jak skazaŭ Svabodzie Siarhiej Zubovič, dyrektar Mazałaŭskaj škoły Viciebskaha rajonu, bijametryčnyja testy dla školnikaŭ jak dla ŭdzielnikaŭ prajektu biaspłatnyja. Kali ž pravodzić test samastojna, u Miensku jon budzie kaštavać 50 rubloŭ na adnaho čałavieka, a ŭ rehijonach — 37 rubloŭ.
«My vyrašyli ŭziacca za hety prajekt, pahladzieć pa bijametryčnych pakaźnikach, kamu ź dziaciej jakija vidy sportu blizkija, — kaža Zubovič. — Voś, naprykład, jon zajmajecca lohkaj atletykaj, a pa jahonych bijametryčnych dadzienych budzie bolš vyhadna zajmacca inšym vidam sportu ŭ dalejšym».
U Ministerstvie adukacyi Svabodzie paćvierdzili, što inavacyjny prajekt ź Leanidam Dvareckim uzhodnieny. Tut abapirajucca na dośvied Federacyi bijatlonu, dzie pravodziłasia bijametryčnaje testavańnie, skazaŭ Svabodzie Alaksandar Maciušonak z Hałoŭnaha ŭpraŭleńnia vychavaŭčaj pracy i moładzievaj palityki Minadukacyi.
«Na hod atrymlivajecca 3—4 dziciaci, jakija traplajuć u škołu alimpijskaha rezervu, — skazaŭ Maciušonak. — Adkryvajecca talent, vyznačajecca, što dzicia talenavitaje ŭ hetym kirunku. A tut była takaja inicyjatyva — pasprabavać jak pilotny prajekt pa ŭsich škołach. Čakańni ad jaho planujucca niadrennyja».
Spartovyja medyki: heta paranavuka, vieryć takim testam nielha
Ina Čarnykova, zahadčyca labaratoryi psychalohii sportu Dziaržaŭnaj ustanovy «Respublikanski navukova-praktyčny centar sportu», kaža, što dermatahlifičnyja testy nielha ŭsprymać surjozna.
«Vyznačać schilnaść navat pa hienetyčnych daśledavańniach dosyć składana, — skazała Ina Čarnykova. — Bijametryčnyja testy — heta jašče bolš farmalny padychod. Tak skažam, paranavukovy».
Pa słovach Iny Čarnykovaj, bijametryčnyja testy ŭ biełaruskim sporcie aficyjna nie vykarystoŭvajucca.
«Dziaržaŭnyja ŭstanovy, jak my, majuć prava vykarystoŭvać tolki sertyfikavanyja surjoznyja metodyki. Jany [Leanid Dvarecki. — RS] sprabavali padavać navukovy prajekt [u Minsportu. — RS], ale jon byŭ raskrytykavany. Było zajaŭlena, što nijakaj supracy być nia moža».
Zamiežnyja navukoŭcy: heta chiramantyja, vyniki nielha prymać usurjoz
Takija sertyfikaty atrymlivajuć školniki paśla taho, jak zdaduć adbitki palcaŭ
Rasiejskija navukoŭcy vykazvajucca nakont bijametryčnych testaŭ jašče bolš kateharyčna. U 2016 hodzie Kamisija pa baraćbie ź iłženavukaj i falsyfikacyjaj navukovych daśledavańniaŭ pry Prezydyjumie Rasiejskaj akademii navuk vydała Memarandum pa dermatahlifičnym testavańni. Akademičnyja navukoŭcy nazvali takija testy chiramantyjaj.
«Navukovych paćvierdžańniaŭ tamu, što pa adbitkach palcaŭ možna vyznačyć zdolnaści čałavieka abo dać rekamendacyi pa vybary vidaŭ sportu, prafesii abo partneraŭ, nie isnuje».
Navukoŭcy rajać nie karystacca płatnymi pasłuhami kampanij, jakija pravodziać bijametryčnyja testy. A ŭžo atrymanyja vyniki testavańnia nie prymać usurjoz.
«Dziaržaŭnym arhanizacyjam, asabliva adukacyjnym, nie supracoŭničać z pradstaŭnikami dermatahlifičnych kampanij, bo heta moža pryvodzić da navukova nie abhruntavanaj i niezakonnaj dyskryminacyi hramadzian u častcy atrymańnia imi adukacyi i pracy».
Siarod kampanij, jakija pravodziać bijametryčnyja testy, zhadvajecca i InfoLife, čyju technalohiju vykarystoŭvaje Leanid Dvarecki.
Minsportu: kampanija nia maje da nas dačynieńnia
Zajaŭlenyja partnery kampanii. Skrynšot z sajtu http://rcspo-best.by
Siarod partneraŭ Dvareckaha pieršym paznačana Ministerstva sportu i turyzmu. Ale tam vielmi ździvilisia zajaŭlenamu partnerstvu. Vital Haptar, načalnik adździełu spartovaj navuki, medycyny i andtydopinhavaha kantrolu, skazaŭ, što Dvarecki nia maje dačynieńnia da ministerstva.
«My rabili ŭžo zaŭvahu, kazali, kab jany heta z sajtu prybrali, — skazaŭ Vital Haptar Svabodzie. — Chto hatovy ź im supracoŭničać — na svoj strach i ryzyku…»
Vital Haptar kaža, što znajomy ź dermatahlifičnaj technalohijaj (tak jana dakładna nazyvajecca). Ale kab na 100% vyznačyć schilnaść dziciaci da peŭnaha sportu, niedastatkova ŭziać jahonyja adbitki palcaŭ. Treba pravieści prynamsi šeść hienetyčnych testaŭ, što kaštuje bolš za tysiaču dalaraŭ.
«Ja nia dumaju, što realna možna vyznačyć schilnaść pa samych elementarnych testach», — skazaŭ Haptar.
Vital Haptar pryhadaŭ, što Leanid Dvarecki raniej pracavaŭ u Ministerstvie sportu. Havorka idzie pra 1990-ja i pačatak 2000-ch, kali Leanid Dvarecki pracavaŭ u ministerstvach sportu i adukacyi. Da 2006 hodu byŭ namieśnikam dyrektara Navukova-daśledčaha instytutu fizyčnaj kultury i sportu. Jak pisała hazeta «Priessboł», u 2006 hodzie Dvarecki byŭ asudžany na 5 hod z kanfiskacyjaj majomaści. Sud abaviazaŭ spahnać ź Leanida Dvareckaha i jahonaha kalehi Michaiła Sałamianca 1,2 miljarda rubloŭ (na toj čas — 535 tysiač dalaraŭ). Piać hod jamu było zabaroniena zajmać pasady, źviazanyja z vykanańniem arhanizacyjna-rasparadčych i administracyjna-haspadarčych funkcyj.
Tady śledztva pryjšło da vysnovy, što Dvarecki i Sałamianiec «pry praviadzieńni tendernych zakupak pa nabyćci strukturami Minsportu spartovaha i medyčnaha abstalavańnia z 5 lutaha pa lipień 2005 hodu skłali i nakiravali ŭ adras Minsportu nia mienš za dziesiać fiktyŭnych pratakołaŭ pasiedžańniaŭ tendernaj kamisii NDIFKS z adnaasobna vybranymi imi pieramožcami pa pastaŭcy materyjalnych kaštoŭnaściaŭ pa šmatkroć zavyšanych cenach».
Zamiest ofisu kampanii — kabinet muzyki ŭ adukacyjnym centry
Pa adrasie na sajcie raźmieščany adukacyjny centar «Kantakt»
«Respublikanski navukova-praktyčny centar spartovaj i prafesijnaj aryjentacyi» — heta nie dziaržaŭnaja arhanizacyja, a pryvatnyja kampanija. Jaje dyrektar — Leanid Kazimiravič Dvarecki. Jon taksama pracuje načalnikam adździełu dyjahnostyki i rezervu kadraŭ u dziaržaŭnym Instytucie pavyšeńnia kvalifikacyi i pierapadrychtoŭki kiraŭničych rabotnikaŭ i specyjalistaŭ fizyčnaj kultury, sportu i turyzmu. Kampanija zarehistravanaja ŭ 2014 hodzie na syna Dvareckaha — Jaŭhiena Leanidaviča. Jana pracuje pa franšyzie InfoLife u Biełarusi.
Na sajcie kampanii vielmi ścisła tłumačycca technalohija bijametryčnych testaŭ: «Pa adbitkach palcaŭ ruk vyznačajecca ŭzrovień pryrodžanych zdolnaściaŭ (u pracentach) da 19 alimpijskich i 13 niealimpijskich vidaŭ sportu».
Dziela praviadzieńnia testu vykarystoŭvajucca aparaty InfoLife. Heta rasiejskaja kampanija, jakaja i raspracavała prahramnaje zabieśpiačeńnie. Dziela hetaha praanalizavali adbitki palcaŭ bolš jak 6 tysiač čałaviek.
Voś tak vyhladajuć vyniki testaŭ, jakija vydajuć u «Respublikanskim centry». Jany nadrukavanyja na firmovych blankach kampanii InfoLife. Značycca kampanija i ŭ pieraliku partneraŭ «Respublikanskaha centru».
InfoLife u pieraliku partneraŭ kampanii Leanida Dvareckaha
Fizyčna instytut nidzie nie raźmieščany. My pryjechali pa adrasie, paznačanym na sajcie, ale znajšli kabinet muzyki ŭ Centry dadatkovaj adukacyi dziaciej i moładzi «Kantakt».
«Jaki centar? — nie razumieje adrazu achoŭnica. — A… Hety pra adbitki palcaŭ. Dyk jon tut užo dva miesiacy nie źjaŭlaŭsia».
Leanid Dvarecki: kamentary tolki z dazvołu rektara
Instytut pavyšeńnia kvalifikacyi i pierapadrychtoŭki kiraŭničych rabotnikaŭ i specyjalistaŭ fizyčnaj kultury, sportu i turyzmu, dzie pracuje Leanid Dvarecki
Pa telefonach, paznačanych na sajcie, adkazvaje sam Leanid Dvarecki. Spačatku telefanujem i pradstaŭlajemsia jak achvočyja prajści test.
«Pa hetaj metodycy abaronienaja ŭžo nie adna doktarskaja dysertacyja, kandydackija. My supracoŭničajem z Usierasiejskim navukova-daśledčym instytutam pa fizkultury i sporcie, — kaža Dvarecki praz telefon. — Kab vyznačyć dakładnaść prahramy ŭ Biełarusi, my praviali abśledavańnie 15 alimpijskich čempijonaŭ i pryzeraŭ alimpijskich hulniaŭ».
Buklety kampanii, što pravodzić bijametryčnyja testy, kala kabineta Dvareckaha
Potym telefanujem da Dvareckaha jak žurnalisty Radyjo Svaboda. Spačatku jon pryznačyŭ sustreču na svaim pracoŭnym miescy ŭ Instytucie pavyšeńnia kvalifikacyi, ale na nastupny dzień admoviŭsia razmaŭlać.
— Treba sustrakacca aficyjna. Rektar instytutu daje nam dabro. Aficyjna da jaho, i z vami z pryjemnaściu sustrenusia i pahavaru.
— A pry čym tut rektar, kali kampanija nie naležyć instytutu?
— Ja nie pryvatnaja asoba. Ja pracuju na dziaržaŭnaj słužbie.
