«Dziakuj Bohu, u Biełarusi siońnia takoha imknieńnia da aŭtakiefalii niama», — cytuje mitrapalita Paŭła «Jeŭraradyjo».
Intervju kiraŭnika Biełaruskaj pravasłaŭnaj carkvy vyjšła na telekanale STV.
Ukrainskaja pravasłaŭnaja carkva atrymała aŭtakiefaliju ad kanstancinopalskaha patryjarcha. Maskoŭskaja patryjarchija nie pryznała hetaje rašeńnie i abviaściła ab razryvie z Kanstancinopalem. BPC taksama padtrymała rašeńnie Maskvy.
«Ale vy pahladzicie, što adbyvajecca na samaj spravie. Abjadnalisia schizmatyki z raskolnikami, pravasłaŭnych ža niama. Siarod usiaho jepiskapatu ŭsiaho dva čałavieki tolki vyrašyli pierajści tudy. Astatniaja masa — vielizarnaja kolkaść ludziej, 90 jepiskapaŭ, pravasłaŭnyja vierniki, pravasłaŭnyja śviatary — jany hetaha nie chočuć. Jany chočuć, kab carkva była adzinaj», — prakamientavaŭ ukrainskija padziei mitrapalit Pavieł.
Jon vystupiŭ rezka suprać aŭtakiefalii dla biełaruskich pravasłaŭnych.
«Dziakuj Bohu, u Biełarusi siońnia takoha imknieńnia da aŭtakiefalii niama. Razdajucca časam niekatoryja hałasy: «A ci nie paprasić i nam u Biełarusi?» Ale vy viedajecie, całkam ščyra i adkryta treba skazać: kali dla Ukrainy heta strašnaja trahiedyja, sproba naviazać aŭtakiefaliju, to kali heta budzie adbyvacca ŭ Biełarusi, to dla Biełaruskaj pravasłaŭnaj carkvy heta budzie śmierć. Usio. Heta asudžeńnie Biełaruskaj pravasłaŭnaj carkvy da źniščeńnia. Dziakuj Bohu, što siońnia jepiskapat Biełaruskaj carkvy i śviatary, i praktyčna ŭsie vierniki pra heta nie dumajuć», — zajaviŭ kiraŭnik BPC.
Pa słovach mitrapalita, padzieł u pravasłaŭnym śviecie patrebny «tamu, chto choča varožaści i nianaviści».
Varta adznačyć, što kiraŭnika «Biełaruskaj pravasłaŭnaj carkvy» pryznačaje patryjarch maskoŭski. I mitrapalit Fiłaret, i mitrapalit Pavieł — uradžency Rasii, jakija da pryznačeńnia ŭ Minsk nijak nie byli źviazanyja ź Biełaruśsiu. Amal va ŭsich cerkvach u kazaniach i abviestkach vykarystoŭvajecca ruskaja, a nie biełaruskaja mova. Sama sučasnaja Ruskaja pravasłaŭnaja carkva była spačatku razhromlena savieckimi ateistyčnymi ŭładami, a paśla nanoŭ stvorana ŭ 1943 hodzie ź liku łajalnych jepiskapaŭ pad pilnym kantrolem NKVD.
