List 50 hadoŭ zachoŭvaŭsia ŭ kapsule, zakładzienaj u ścianu budynka Aršanskaha rajvykankama, piša Radyjo Svaboda.
Na marmurovaj šyldzie, jakoj było adznačana hetaje miesca, byŭ napisany zapaviet: uskryć 1 studzienia 2019 hodu. Siońniašnija ŭłady zapaviet parušyli: kapsułu ŭskryli tolki 8 studzienia.
Z hetaj nahody kala rajvykankamu zładzili mitynh, sabraŭšy kala 300 žycharoŭ horadu. Pavodle tekstu lista, da ich źviartałasia ŭsio 100-tysiačnaje nasielnictva tahačasnaj Voršy.
«Vorša — naša luboŭ, naša hordaść, naša bajavaja, revalucyjnaja i pracoŭnaja słava. Dla vas jana — historyja», — havaryłasia ŭ dopisie, ahučanym staršyniom rajvykankamu Iharam Isačankam, jaki asabista ŭskryŭ kapsułu. 50-hadovy list byŭ napisany pa-biełarusku, i niekatoryja vyrazy mahli b prahučać i ŭ pramovach sučasnych čynoŭnikaŭ:
«My zaviaščajem vam: hanaryciesia horadam, jaki budavali my. Jon čaścinka našaj Radzimy, a Radzimu treba lubić».
Pasłańnie pačynałasia vinšavańniem «ź vialikim śviatam 50-hodździa BSSR i Kampartyi Biełarusi», a zakančvałasia zvarotam da naščadkaŭ, jakija ŭ 2019 hodzie musili b žyć u «śvietłaj budučyni»: «My bačym u vas rysy ludziej kamunizmu».
Histaryčny list i kapsułu pieradali ŭ Muzej historyi i kultury, a zamiest staroj kapsuły ŭ ścianu zakłali novuju, z čarhovym pasłańniem da naščadkaŭ, jakoje treba budzie dastać jašče praz 50 hadoŭ. Novaje pasłańnie napisanaje pa-rasiejsku.
Tekst lista byŭ ahučany, u im havorycca pra nadziei na lepšaje i pieramohu nad žyćciovymi ciažkaściami. Ale daviedacca źmiest pasłańnia zmahli tolki prysutnyja na mitynhu. Jak skazali ŭ rajvykankamie, hety tekst nidzie drukavacca nia budzie. Čynoŭniki spadziajucca, što budynak prastaić jašče 50 hadoŭ.