Deputatka Pałaty pradstaŭnikoŭ, staršynia Tavarystva biełaruskaj movy Alena Anisim abvieściła pra svoj namier udzielničać u nastupnych prezidenckich vybarach. Chto ž takaja spadarynia Anisim?
Alena Anisim. Fota Siarhieja Hudzilina.
Ziamlačka Jakuba Kołasa, była ŭ Majstroŭni
Alena Anisim naradziłasia ŭ 1962 hodzie ŭ vioscy Savoni Staŭbcoŭskaha rajona, na toj čas heta było pasielišča ŭ 90 dvaroŭ. Heta niedaloka ad Mikałajeŭščyny Jakuba Kołasa. Baćki pracavali nastaŭnikami. Mama vykładała matematyku, baćka — movy. Jaje dziavočaje proźvišča — Amielčyc.
Paśla škoły Anisim pastupiła na vučobu na fiłfak BDU. Na toj čas na fakultecie ŭtvaryłasia mocnaja supołka «Majstroŭnia» — niefarmalnaje moładzievaje zhurtavańnie, jakoje staviła za metu adradžeńnie biełaruskaj movy, a ŭrešcie — zdabyćcio krainaj niezaležnaści.
«U «Majstroŭni» Alena kim tolki ni była: śpiavačkaj, udzielnicaj usich imprezaŭ», — zhadvaŭ u svajoj knizie Siarhiej Dubaviec.
«Ja vielmi ščaślivaja tym, što naradziłasia ŭ svajoj krainie. Ja vielmi ščaślivaja tym, jakija ŭ mianie adnaviaskoŭcy, siabry sa škoły. I vielmi ščaślivaja tym, što ŭ maim žyćci była Majstroŭnia. Bo kali takija rečy jość u maładości, možna tolki zajzdrościć samomu sabie», — kazała sama Anisim.
Namieśnica Trusava, deputatka parłamienta
Śviadoma na biełaruskuju movu Anisim pierajšła jašče ŭ pačatku 1980-ch. Jana kaža, što taki pierachod nie byŭ vielmi lohkim, choć jana i pryvykła razmaŭlać pa-svojmu ŭ vioscy. «Nielha być uvieś čas razdvojenym — tamu ja pajšła dalej», — kazała jana.
Ad 1991 hoda Anisim pracuje ŭ Instytucie movaznaŭstva Akademii navuk. Źjaŭlajecca namieśnicaj Aleha Trusava ŭ Tavarystvie biełaruskaj movy, adnoj z najbujniejšych niedziaržaŭnych arhanizacyj krainy. Taksama Alena Anisim niejki čas viała pieradaču «Biełaruskaja mova» na telekanale ANT.
Tolki ŭ kastryčniku 2017 hoda Alena Anisim užo sama ŭznačaliła TBM, kali Aleh Trusaŭ vyrašyŭ krychu adpačyć ad hramadskaj dziejnaści.
U 2016-m Anisim stała deputatkaj Pałaty pradstaŭnikoŭ. Na jaje Staŭbcoŭskaj akruzie ŭłada nie vyłučyła svajho kandydata. Tamu ŭ vyniku Anisim nabrała bolš za 40% hałasoŭ i prajšła ŭ parłamient.
Maci troch synoŭ
U Aleny Anisim troje synoŭ, nichto ź ich, praŭda, nie zajmajecca hramadskaj dziejnaściu. Jak nichto ź ich nie atrymaŭ i vyšejšaj adukacyi. Starejšy zajmajecca ramontam aŭtamabilaŭ, siaredni — pracuje achoŭnikam. Małodšy advučyŭsia na kraŭca, pracavaŭ na fabrycy «Kalinka», a ciapier ramantuje mabilnyja telefony.
Z mužam Alena paznajomiłasia jašče padčas studenctva, pabralisia na piatym kursie. Muž u svoj čas zajmaŭsia biznesam, jon skončyŭ miechmat.
Žyvie deputatka ŭ čatyrochpakajovaj kvatery ŭ minskim mikrarajonie Paŭdniovy Zachad. Na zakupy chodzić u bližejšy «Jeŭraopt». Na šopinh za miažu, kaža, što nikoli nie jeździć, bo lubić biełaruskija tavary. Hatuje kožny dzień.
«Ja ni ŭ jakim razie nie fieministka», — kaža jana.
Hladzi taksama: Siamiejnyja sakrety deputatki Aleny Anisim
Užo sprabavała vyłučacca ŭ prezidenty
Letam 2014 hoda prajšła niečakanaja infarmacyja, što Alena Anisim budzie vyłučacca kandydatam na prezidenckich vybarach. Sama jana hetaha nie admaŭlała.
«U palityku iści mnie nie strašna, bo ja ŭžo dosyć pažyła, toje-sioje maju za plačyma, jak u asabistym, hetak i ŭ prafiesijnym, ty razumieješ, ci tabie spynicca na peŭnym uzroście, ci raści dalej», — kazała jana ŭ intervju «Našaj Nivie».
Paśla hetaha, u tym liku namahańniami Anisim, byli praviedzienyja niekalki siesij Kanhresu za niezaležnaści, ale asablivaj papularnaści jany nie zajmieli.
Praŭda, da vyłučeńnia sprava tak i nie dajšła. «Ja razumieju, što ŭ dadzienaj situacyi pieramohu atrymać niemahčyma, a ja zvykła dasiahać pośpiechu ŭ luboj spravie, za jakuju biarusia», — skazała Anisim u červieni 2015 hoda.
Pieraniesła ciažkuju apieracyju
U pačatku hoda Alena Anisim pieraniesła apieracyju. Praŭda, nie kaža jakuju mienavita. «Na ščaście, dyjahnaz nie samy strašny. Ale ja niejak usio vielmi ciažka pieraniesła, i pieryjad adnaŭleńnia byŭ niaprostym, z uskładnieńniami», — kazała jana. Pierad hetym u jaje jašče była apieracyja na voku. «Kali pryjšła ŭ Pałatu, to stolki pracy, stolki stresaŭ», — tłumačyć jana svoj stan zdaroŭja.
Letam u Anisim byŭ kanflikt ź biznesoŭcam Arkadziem Izrailevičam, jaki abvinavaciŭ deputatku ŭ raspalvańni antysiemityzmu. Praŭda, potym Izrailevič vybačaŭsia i daryŭ Anisim kvietki, ale pazoŭ suprać haziety «Novy čas» tak i nie adklikaŭ.
U Pałacie pradstaŭnikoŭ Anisim raspracavała pieršy zakonaprajekt na dźviuch movach «Ab narmatyŭna-pravavych aktach», ale inšaja deputatka, uradženka Rasii, Natalla Hujvik zarezała hetuju inicyjatyvu Anisim.
Anisim była siarod tych, chto hałasavaŭ suprać tak zvanaha «dekreta ab darmajedach». Nie padtrymała jana i źmieny ŭ zakanadaŭstva ab ŚMI nakont taho, što ciapier usie kamientatary abaviazanyja pryviazvać svoj nik da numara telefona.
