U kancy lutaha na svajoj staroncy ŭ fejsbuku Maryna apublikavała fotazdymak žančyny, jakaja da siońnia ličacca źnikłaj bieź viestak.
Maryna Sakałoŭskaja raskazvaje:
«U ZŠA spravy pa źnikłych bieź viestak nie zakryvajuć da taho času, pakul nie stanie viadoma, što ŭsio ž taki zdaryłasia z čałaviekam, niachaj jon prapaŭ navat 100 hadoŭ tamu. Taksama i pa znojdzienych, ale nie apaznanych ciełach, šukajuć rodnych da apošniaha, jak i zabojcaŭ, kali heta kryminał. Zdarajecca, što cieły dobra apranutyja, dahledžanyja, majuć na sabie darahija kaštoŭnaści, ich zuby ŭ dobrym stanie, a ich nichto nie šukaje i lažać jany hadami ŭ marazilnych kamierach».
Adna z takich historyj pra žančynu, mahčyma, ź Biełarusi.
Jaje cieła znajšli ŭ štacie Masačusets 30 kastryčnika 1996 hoda. Miarkujecca, na toj momant joj było ad tryccaci da saraka piaci hadoŭ.
«Žančynu zabili — pa hałavie ŭdaryli, a zatym u jaje jašče strelili nie mienš za 12 raz, — raskazvaje Maryna Sakałoŭskaja. — Užo miortvaje cieła zaharnuli ŭ dva śmiećcievyja miaški, zatym u dźvie koŭdry i vykinuli ŭ vadu. U vadzie jana prabyła kala sutak, cieła nie paśpieła raskłaścisia, tamu malunak adpaviadaje tamu, jak žančyna mahła vyhladać».
I voś na ruce hetaj žančyny byŭ nadziety załaty piarścionak sa smarahdam.
«Ekśpierty ŭstanavili, što piarścionak zrobleny ŭ Biełarusi. I jašče adno: jaje zuby byli adramantavanyja vidavočna nie ŭ ZŠA, mahčyma, u Biełarusi, Rasii ci Ukrainie. Dy i adbitkaŭ palcaŭ nie znajšłosia ŭ bazie krainy — žančyna mahła patrapić na terytoryju ZŠA praź Mieksiku».
Za hady pošukaŭ Marynie Sakałoŭskaj udałosia znajści 121 čałavieka, siarod jakich byŭ i Uładzimir Kandracienka z Homiela.
«Ja šukała jaho čatyry hady. Tamu chočacca vieryć, što i ŭ nieviadomaj z Masačusetsa taksama jość šaniec».