Štohod biełarusy jak u krainie, tak i pa-za jejnymi miežami źbirajucca razam, kab adznačyć čarhovuju hadavinu ŭvaskrasieńnia Baćkaŭščyny — uračystaść adradžeńnia Biełaruskaje dziaržavy. Jejny tryvały pačatak byŭ pakładzieny 101 hod tamu Treciaju Ŭstaŭnoju hramataju Biełaruskaje Narodnaje Respubliki, pryniataj paśla ciažkich debataŭ unočy z 24 na 25 sakavika 1918 hodu ŭ Miensku.
Novaja akcyja Arche maje za metu raspluščyć biełarusam vočy na našuju blizkuju historyju, uzbahacić ich hruntoŭnymi viedami, jakija vytrymajuć pravierku pry kožnym sutyknieńni z chłuśnioju dy manipulacyjaj.
U miežach akcyi prapanujucca 6 papiarovych i 11 elektronnych vydańniaŭ, pryśviečanych historyi Biełaruskaj Narodnaj Respubliki. Ceny na ich źnižanyja.
Pačynajecca padborka z uspaminaŭ niepasrednaha vidavočcy abviaščeńnia niezaležnaści BNR, viadomaha movaznaŭca j historyka Jana Stankieviča, zapisanych pad nazovam «Uzychodziła sonca niezaležnaje Biełarusi. Da abvieščańnia niezaležnaści Biełarusi 25 sakavika 1918 h.», što źmiaščajucca ŭ zborniku jahonych publicystyčnych i navukovych tvoraŭ «Za rodnuju movu j praŭdzivy nazoŭ».
Taksama prapanujecca manahrafija daślednicy z Toruńskaha ŭniversytetu Daroty Michaluk «Biełaruskaja Narodnaja Respublika 1918 — 1920 hh.: la vytokaŭ biełaruskaj dziaržaŭnaści».
Kniha Ŭładzimiera Lachoŭskaha «Ad homanaŭcaŭ da hajsakoŭ. Čynnaść biełaruskich maładziovych arhanizacyj u 2-j pałovie XIX st. — 1-j pałovie XX st. (da 1939 h.)» bahata ilustravanaja. Jana daśleduje, jak na pačatku XX st. moładź dałučyłasia da niezaležnickaha ruchu j stała jahonaju važkaju siłaju.
Kniha «Bałachoŭcy. Śviedčańni, dakumienty, daśledavańni» raskazvaje pra vajskovaje zmahańnie za niezaležnaść Biełarusi ŭ 1918-1921 hadoch. Asablivuju ŭvahu vyklikaje hłybokaje daśledavańnie historyka Jurasia Jurkieviča «Stvareńnie i dziejnaść Asobnaha atrada BNR u Bałtyi».
Siarod elektronnych publikacyj pryciahvaje ŭvahu Historyja BNR u karcinkach. Faktyčna heta ŭnikalny tematyčny fotaalbom. U im publikujucca sotni tolki aŭtentyčnych fotarepradukcyjaŭ, jakija ilustrujuć roznyja aspekty dziejnaści BNR: partrety jejnych lidaraŭ, roznaha kštałtu dakumenty (ustaŭnyja hramaty, pašparty, adozvy, abviestki). Dajucca faksymile piačatak, marak, paštovak dy inšaj aŭtentyčnaj atrybutyki.
Akcyja dziejničaje ad 20 da 31 sakavika.
Infarmacyja pra toje, jakija jašče knihi i publikacyi možna atrymać u jaje časie i jak heta zrabić, jość na sajcie Arche.
TAA «Hajsak» UNN 191768717
